ABADABUKA eZimbabwe abahlala kuleli, ngoLwesihlanu bacele ukuthi i-African National Congress (ANC) ingenelele enkingeni yodlame oluqhubekayo ezweni labo elibhekene nezinkinga kwezomnotho.
Lezi zakhamizi zivukele ekomkhulu le-ANC eLuthuli House zizozwakalisa izikhalo zazo kuMengameli uMnuz Cyril Ramaphosa. Ohlanganise lezi zakhamizi uMnuz Tino Mambeu uthe bazokhala kuRamaphosa ngaba wacela ukuthunywa njengoba esebizwa ngoThuma Mina.
“Mayikhululwe iZimbabwe, sithuma wena Ramaphosa,” kubhalwe kwezinye zezingqwembhe ebeziphethwe abaseZimbabwe.
UMambeu uthe bangaphezulu kuka-15 esebebulewe kwalimala abawu-276 kulandela ukujuthswa kombutho wamasosha ukubhekana nemibhikisho equbukile kulandela ukumenyezelwa kokunyuka kwentengo kaphethroli.
Ngempelasonto uMengameli waseZimbabwe uMnuz Emmerson Mnangagwa umemezele ukunyuka kukaphethroli usuka kuR19 ilitha wawubeka kuR45.
Izakhamizi zaseZimbabwe ezihlala kuleli ezikhathazekile ngesimo esiqhubekayo kuleliya lizwe ngesikhathi zizokhala emahhovisi e-ANC eLuthuli House. Video: Thembelihle Mkhonza/ANA
“Sikholelwa ukuthi iZanu-PF isihlulekile ukufeza izithembiso zayo eyazibeka ngaphambi kokhetho, ngaphandle kweminye imithetho esiyiphulile ethinta amalungelo abantu. Isisombululo manje ukuthi izintambo zobuholi zinikezwe umuntu ongahlangene neZanu-PF,” kusho uMambeu.
Uthe bafuna uRamaphosa atshele uMnangagwa ukuthi ehle esikhundleni sokuhola izwe ngaphambi kokuthi liwe bhu phansi.
“Uma kuhluleka i-ANC sizophoqeleka ukuthi sizivikele,” usho kanje.
NgoLwesibili uhulumeni waseNingizimu Afrika uthe ukuqaphe ngeso lokhozi okuqhubeka eZimbabwe.
Owesilisa ophuthunyiswe eisbhedlela ngemuva kokushaywa amasosha elokishini iSizinda elikwaBulawayo, eZimbabwe ngoLwesithathu. Isithombe: AP Photo/KB Mpofu