UBHEKE kubabukeli abangu-11 million umdlalo Uzalo kwiSABC1 njengoba izibalo zikhombisa ukuthi bayanyuka inyanga nenyanga.
Lo mdlalo kulo nyaka uqophe umlando uba umdlalo wokuqala kuleli ukufinyelela esibalweni sababukeli abangu-10 million.
Ngo-Agasti ababukeli balo mdlalo bafinyelele ku-10 063 624, ngoSepthemba babangu-10 143 270 kwathi ezibalweni ezikhishwe kuleli sonto zafinyelele ku-10 403 773.
Imidlalo emisha engene kwiMzansi Magic nayo yenza kahle njengoba umdlalo Ifalakhe, Ithemba neThe River ifike kwezwakala kulesi siteshi.
Umdlalo Ifalakhe ufike wabamba indawo yesine njengoba ubukwa ngabantu abangu-1 104 906.
Phambilini kulesi siteshi bekuhamba phambili iThe Queen enababukeli abangu-1. 2 million esilele isibili njengoba uhlelo ama-Idols luhamba phambili ngababukeli abangu-1. 3 million.
Yize sekuphele inyanga uhlelo Uyajola 9/9 lwaphela kodwa lubambe eyesihlanu. Lolu hlelo lubukwa ngabantu abangu-764 713.
Umdlalo okubukeka uthandwa ngabaningi iThemba wona ubukwa ngabantu abangu-507 036.
Uhlelo Uyangithanda Na? olwethulwa uMoshe Ndiki kubukeka lungenzi kahle njengoba lukhuze ibuya.
Lolu hlelo aluveli ohlwini lwezinhlelo zakamuva nolwethulwa uDineo Ranaka oluthi Yim Lo ezibalweni ezikhishiwe.
Eziteshini zakwaSABC akukho okushintshile njengoba kwiSABC3 Isidingo sisaqhubeka nokubamba indawo yokuqala ngababukeli abangu-957 500.
UMuvhango neGiyani imidlalo eyenza kahle kwiSABC2 njengoba izibalo zababukeli ziphezulu kuyona yomibili.
Umdlalo Umakoti kwiSABC1 wehlelwe ababukeli njengoba uke wahlala endaweni yesine ngesikhathi ufika kodwa manje ubambe indawo yesithupha ngababukeli abangu-4 300 239.
Izinhlelo iGenerations:The Legacy ebambe indawo yesibili kwaSABC1, Skeem Saam elele endaweni yesithathu, Izindaba zolimi lwesiZulu ezilele endaweni yesine kwathi ezesiXhosa zalala endaweni yesihlanu zisaqhubeka nokwenza kahle.