KULINDELWE impendulo kaMengameli uCyril Ramaphosa, ngesicelo sokuba iNdlovukazi Shiyiwe Mantfombi Dlamini Zulu, ihlonishwe ngokutshalwa okusezingeni likahulumeni.
Izolo uNdunankulu waKwaZulu-Natal uMnuz Sihle Zikalala, ukuqinisekisile ukuthi uhulumeni wesifundazwe ususifakile isicelo. Okhulumela ihhovisi likandunankulu uMnuz Lennox Mabaso, uthe uRamaphosa usasicubungula isicelo.
“Njengohulumeni wesifundazwe sizolindela impendulo eqhamuka kumengameli.”
INdlovukazi, nebilokhu ibambe isihlalo sobukhosi bakwaZulu kusukela kwebuza iSilo samabandla wonke uGoodwill Zwelithini kaBhekuzulu ngoMashi, ikhotheme ngesonto eledlule kulandela ukudunguzela kanti kusolwa ukuthi iNdlovukazi yadliswa ushevu eminyakeni edlule.
Belungakamenyezelwa usuku lokutshalwa kwayo kepha indlunkulu ibisikuqinisekisile ukuthi ukutshalwa kweNdlovukazi kuzokuba yimfihlo njengoba kwenzeka kwiMbube, eyatshalwa ebusuku.
UMabaso uthe konke kusezandleni zikaRamaphosa ukuthi uma siphumelela lesicelo, iNdlovukazi izonikezwa umgcwabo kahulumeni okusiphi isigaba.
IMbube yanikezwa umgcwabo kahulumeni osesigabeni sokuqala, kanti inkonzo yayo yesikhumbuzo eyabanjwa ngosuku olulandela ukutshalwa kwayo, yayihanjelwe nanguye uRamaphosa.
UMabaso uthe ukukhothama kweNdlovukazi kushiye isizwe sikhungathekile njengoba kufike lapho isizwe sisazikhotha amanxeba ngokwebuza kweSilo.
“Undunankulu nohulumeni wesifundazwe banxusa zonke izakhamizi zakulesi sifundazwe ukuba zibeke emkhulekweni umndeni wasendlunkulu njengoba ubhekene nobunzima.
“Sinxusa wonke umuntu ukuba ahloniphe isikhathi sokuzila. Njengohulumeni wesifundazwe siyakujabulela ukwesekwa kwendlunkulu okukhonjiswa yizakhamizi,” kusho uMabaso.