KUKHONYE i-ANC KwaZulu-Natal nakuzwelonke okhethweni lokuchibiyela obelungoLwesithathu.
Le nhlangano iwagcine wonke ama-ward ebiwaphethe yaphinde yaqumba izimbangi zayo kuma-ward amabili.
Njengoba ebengu-14 ama-ward obekunokhetho lokuchibiyela kuwona, i-ANC idle umhlanganiso kuma-ward angu-12, amabili awo abephethwe yi-IFP neDA ngokwehlukana.
KwaZulu-Natal, i-ANC ihlwithe u-ward 5 KwaMaphumulo yaphinde yagcina ama-ward ayo u-ward 6 eThekwini, ward 7 KwaMaphumulo, ward 4 uBuhlebezwe no-ward 20 eMzimkhulu.
I-IFP idle umhlanganiso ku-ward 5 KwaDukuza, okuyi-ward ebivele iphethwe yilo leli qembu.
Kuzwelonke, i-ANC ihlwithe u-ward 11 kuMasipala iKnysna, eWestern Cape, okuyisizinda se-DA.
I-DA yona ikwaze ukugcina i-ward eyodwa, u-ward 20 kuMasipala waseCape Town.
I-ANC ithe le miphumela ifike ngesikhathi esikahle njengoba nomengameli uMnuz Cyril Ramaphosa, esanda kumemezela usuku lokhetho lohulumeni basekhaya.
Okhulumela le nhlangano, uMnuz Pule Mabe, uthe le miphumela inikeza ithemba lokuthi bazokwenza kahle kulolu khetho oluzoba ngo-Okthoba.
“Njengoba sibheke okhethweni lohulumeni basekhaya, sizoqhubeka nokuxhumana nabantu, ukuze sizwe izidingo zabo, siphinde silwele nokushintsha impilo yabo.”
i-DA ithe le miphumela ikhombisa ukuthi leli qembu seliyavuka liyazithintitha emva kokwenza kabi okhethweni lokuchibiyela olwalungonyaka odlule.
Umholi wale nhlangano, uMnuz John Steenhuisen, uthe kukhona okuhle abakubonile kule miphumela, wathi futhi ibakhombisile ukuthi ilaphi lapho kufanele basebenze kanzima khona.