KUMENYWE nezihlabani zomculo wokholo zakuleli emkhosini wama-Christmas Carols ohlelwe yiTheku ngokubambisana neSolwazi Zulu Foundation ozoba se-ICC eThekwini ngoLwesithathu, mhla ka-20 Disemba.
Abahleli balo mcimbi bathi sekungunyaka wesithathu le khonsathi kaKhisimusi yenzeka njengoba yaqala ngo-2019, yaphazamiswa yi-iminyaka emibili ngenxa ye-Covid 19 yabe isishaya ibuya ngonyaka odlule.
Nonyaka kuzobe kugiya uNtokozo Ngongoma, obengomunye wabaqokelwe kuma-Crown Gospel Awards nonyaka, uLebo Sekgqobela, uThulani “Gah” Ndlela noMqapheli Ndlovu.
Ikhwaya yamaSheshi eyaziwa nge-Anglican SA yiyo ezovula lo mcimbi yenza umculo oqondene nesikhathi sikaKhisimusi. Umculo wama-Carols uhllonishwa kakhulu enkolweni yamaKhrestu njengoba uKhisimusi uba umkhosi wokugubha ukuzalwa kukaJesu.
Abagqugquzeli balo mcimbi bathe kwamanye amaculo i-Anglican SA izobe ihambisana noLebo noNgongoma. Ngonyaka ophelile le khwaya yayibambisene kakhulu noDumi Mkokstad ongekho kulokhu.
Abahleli bathe umcimbi wama-Carols uzoqala ngo-6.30 kusihlwa kuhamba kanti kungenwa mahhala. Amathikithi atholakala e-Ticketpro.
Ngokusho kwabeSolwazi Zulu Foundation, kulo mcimbi wama-Carols babambisene ne-ICC ukwenza umkhankaso wokuqongelela izicathulo zezingane zesikole ezinikelelwa abafundi abadingayo ezikoleni ezihlonzwe njengezidingayo.
Okhulumela iFoundation, uMntwana uQedi Zulu, uthe ngonyaka odlule baqoqa amapheya ezicathulo angaphezulu kuka-6000 anikelwa izinkampani ezahlukene nabantu abanothando lokulekelela. Ucele ukuthi abezayo kuma-Carols bangathenga izicathulo, bazishiye ezindaweni eziyobe zimakiwe khona e-ICC. Uthe lokhu akuyona impoqo kodwa umnikelo ongasuka enhliziyweni yomuntu.