ZIBAKHALELE abalisa ababili baseWeenen abatholakale nezibhamu ezingekho emthethweni.
Laba balisa baboshwe ezigamekweni ezimbili ezihlukene emuva kokutholakala nezibhamu ezingekho emthethweni nezinhlamvu.
Ngokusho kwamaphoyisa umlisa oneminyaka engu-41 uboshwe ngamaphoyisa Othukela Cluster Task Team ekuseni ngoLwesihlanu endaweni yaseManseleni, eSahlume, ephethe i-38 revolver ne-6.35 pistol. Uphinde watholakala ephethe izinhlamvu zalezi zibhamu zombili.
Kwesinye isigameko amaphoyisa ophiko oluqinisekisa ukuphepha emphakathini eMgungundlovu, iPublic Order Policing Unit neLadysmith Tactical Response Unit, abophe umlisa oneminyaka engu-55 emuva kokuthi elunywe indlebe ngezibhamu abezigcine endlini.
Lo mlisa utholakale nesibhamu sohlobo lwe-R5 ebesixikizwe izinombolo. Kuphinde kwatholakala isibhamu sohlobo lwe-CZ74, izinhlamvu ezingu-17, ishotgun nezinhlamvu zayo ezingu-10.
Okhulumela amaphoyisa KwaZulu-Natal, uLt Col Thulani Zwane, uthe izibhamu zitholakale ekhabetheni zingekho esisefeni. Uthe kuphinde kwatholwa esinye ebesihlikihlwe inombolo silahliwe.
Abasolwa bekulindeleke ukuthi bavele eNkantolo yeMantshi eWeenen izolo. Babhekene namacala okutholakala nezibhamu ezingekho emthethweni nezinhlamvu.