I-DA esiShayamthetho KwaZulu-Natal yenze izinguquko eziholele ekutheni lowo owake waba ngumholi wale nhlangano esifundazweni, uMnuz Sizwe Mchunu, akhishwe ekomitini lehhovisi likaNdunankulu.
UMchunu usefakwe ekomitini loMnyango wezemiSebenzi yoMphakathi endaweni yakhe kwangena uMnuz Francois Rodgers.
URodgers ohola leli qembu esiShayamthetho usefakwe ekomitini obekukhona kulo uMchunu.
URodgers wakhethwa ngaphandle kokuphikiswa esikhundleni sokuhola leli qembu esiShayamthetho.
Ezinye izinguquko, uNksz Mbali Ntuli ukhishiwe ekomitini lezeMfundo kwafakwa uDkt Rishigen Virana.
UNksz Ntuli usejutshwe ekomitini lezokuThuthukiswa koMphakathi obekukhona kulo uVirana.
UMnuz Hlanganani Gumbi ungene ekomitini lezokuBusa ngokuBambisana neziNdaba zoMdabu obekukhona kulo uMnuz George Mari osefakwe ekomitini lezokuHlaliswa kwaBantu.
Umholi we-DA KwaZulu-Natal uMnuz Zwakele Mncwango ubukeka engakazimiseli ngokusuka eThekwini njengoba engathinteki ezinguqukweni zeqembu lakhe esiShayamthetho.
Ngokujwayelekile umholi weqembu uba sesiShayamthetho njengoba kade kwenza uMchunu.
Engxoxweni neSolezwe uMncwango wathi ngeke ahambe eThekwini ashiye izinto zisemapeketwane.
"Kuningi okungahambi kahle eThekwini, uma ngingahamba umkhandlu ungashayeka phansi. Ngisazoqhubeka nokuhlala khona ngiyohamba ngoba sengibona ukuthi izinto sezihamba kahle,” kusho uMncwango.
UNksz Ntuli okhulumela iqembu esiShayamthetho KwaZulu-Natal uthe inhloso yalezi zinguquko ukwenza isiqiniseko sokuthi iqembu limeleleke kahle esiShayamthetho.
“Uyazi ukuthi iqembu selinobuholi obusha obusanda kukhethwa, ukushintsha kobuholi kuza nezinguquko eziningi,” kusho uNksz Ntuli.
Uthe isizathu esidale ukuthi uRodgers afakwe ekomitini lehhovisi likaNdunankulu wukuthi nguyena osehola iqembu esiShayamthetho.
“UMchunu ubekuleli komiti ngoba kade engumholi weqembu,” kusho uNksz Ntuli.
UNksz Ntuli uthe ngoMsombuluko bazoba ne-rally eMgungundlovu lapho bezokwethula khona izinhlelo zabo ezingaguqula isimo sesifundazwe ngaphambi kokuthi uNdunankulu uMnuz Willies Mchunu ethule inkulumo yakhe yesimo sesifundazwe.