IPHINDE yangena ehlazweni imenenja kamasipala waseThekwini esamisiwe emsebenzini, uMnuz Sipho Nzuza.
Kulokhu usolwa ngokubanjwa oqotsheni ezitika ngocansi nonkosikazi womuntu. Lezi zinsolo zivela ngemva kusatshalaliswa kwezithombe okuthiwa ngezakhe nomfanekiso oqoshiwe, enqunu.
Kwesinye sezithombe eziqale ukusatshalaliswa ngempelasonto, kubonakala owesilisa okusolwa ukuthi nguNzuza, elele embhedeni eshaya ngesudi yesele.
Kwesinye ubonakala efake isikhindi sangaphansi, enemivimbo emzimbeni kukhombisa ukuthi kade eshaywa. Kumfanekiso oqoshiwe, kuzwakala izwi lowesilisa libabaza ichilo.
Kuzwakala owesilisa ebabaza ukuthi u“Nzuza” ulale nonkosikazi kamngani wakhe. Akucaci ukuthi lezithombe nomfanekiso oqoshiwe zithwetshulwe kuphi nendawo, futhi nini.
UMasipala waseThekwini uzihlangulile ekuphawuleni ngalezi zithombe.
Okhulumela umasipala uMnuz Msawakhe Mayisela, uthe nakuba bezibonile izithombe, abanaso isiqiniseko sokuthi nguye ngempela uNzuza lo, okulezi zithombe nomfanekiso oqoshiwe. Uthe lolu wudaba lwangasese, wayalela ukuba kushayelwe yena mathupha uNzuza.
“Engingakusho nje wukuthi njengomasipala sihlezi sigqugquzela abasebenzi bethu ukuthi baziphathe ngendlela engeke ifake umasipala ehlazweni.”
Imizamo yokuthola uNzuza ukuze aphawule, ayizange iphumelele njengoba ucingo lwakhe belungangeni izolo.
UNzuza usamisiwe emsebenzini njengoba ethinteka ecaleni lethenda yezigidi zamarandi, yokuqoqwa kukadoti kulo masipala. Waboshwa kanye nowayeyimeya yalo masipala, uNkk Zandile Gumede, kuleli cala lethenda kaR350 million.
UNzuza usanda kuhlangabezana nembibizane emizamweni yokuba kuxegiswe imibandela yakhe yebheyili, ukuze akwazi ukubuyela emsebenzini. Inkantolo yasichitha isicelo sakhe, yathi kufanele alinde kuze kuphele icala lakhe ngaphambi kokuthi abuyele emsebenzini.