Kuleya ndawo kusanda kubulawa amalungu amahlanu omndeni wakwaNxele, nabafana bendawo abathathu. Kusolwa ukuthi kunombango oqhubekayo wemindeni endaweni.
Abasolwa baboshwa ngeledlule bavela enkantolo ngemva kokuthi amaphoyisa eshaqe izibhamu eziyisishiyagalombili, izinhlamvu ezingu-107, izimoto ezintathu nezidakamizwa.
Okhulumela amaphoyisa uBrigadier Jay Naicker uthe ngemva kokubulawa kwabantu abayisishiyagalombili okwenzeke ngosuku olulodwa batshale amaphoyisa ukuba aqaphe.
“Kuboshwe abasolwa abayisishiyagalolunye ngamacala ahlukene eTaylors Halt selokhu kwatshwala amaphoyisa ukuba aqaphe. NgoLwesithathu olwedlule ngabo 1.30 ekuseni, amaphoyisa eProvincial Task Team abe nomkhankaso eMafunze abopha abasolwa ababili athatha izibhamu ezintathu. Ababoshiwe yizelamani ezineminyaka engu-33 no-38. Bavelile ngoLwesine enkantolo yaseMgungundlovu. Baboshelwe icala lezibhamu nezinhlamvu. Icala lihlehliselwe uSepthemba 25. Kusazohlolwa izibhamu ukuthi azithinteki yini ekubulaweni kwabantu endaweni,” kusho uNaicker.
Umkhuzi wamaphoyisa KwaZulu-Natal uLieutenant General Khombinkosi Jula, uncome ukuboshwa kwala basolwa.
“Ngigculisekile ngomphumela wokuba kutshalwe amaphoyisa nemizamo eyenziwa ukulwa nobugebengu kuleya ndawo. Siyathemba ukuthi kuzoba khona ababoshwayo ngamacala akamuva,” kusho uJula.