UMPHAKATHI wakwaHlabisa naseHluhluwe ukhuculule amadolobha endawo ngenhloso yokunqanda ukwanda kwabahlala ezitaladini ababizwa ngamaPhara nokudungeka kwesimo sezulu esigcina sidale izikhukhula.
Lokhu kuvele emkhankasweni wezinsuku ezimbili okunguMsombuluko noLwesibili wokukhuculula udoti edolobheni lakwaHlabisa nelaseHluhluwe.
IKhansela lakwa-Ward 12, uMnuz Cabangokuhle Ncengwa kwaHlabisa ebeliphume nomphakathi walo, lithe okunye abazama ukukugwema ukuba idolobha labo lingagcini selibalekelwa yizivakashi njengoba liyintandokazi kwabasuka kwamanye amazwe.
"Sibone kungcono ukuba sisukume nomphakathi ukuze sigweme ukuba idolobha lethu liphenduke inhlekisa ngenxa yokungcola. Siyidolobha elihanjelwa abavakashi abaningi abasuka kwamanye amazwe, ngakho ukungcola kwalo kusho ukulimala komnotho," kusho uNcengwa.
UMnuz Qaphelani Mdletshe waseHluhluwe uthe okubajabulisayo ukuthi ukukhucululwa kwedolobha labo kugwema nokuba kugcine sekugcwala ababizwa ngamaphara kulona.
"Amaphara ayayithanda indawo engcolile. Ngakho ukuyekela idolobha libenemfucuza lokho kusho ukuthi sikhanda isidleke zamaphara," kusho uMdletshe.
Uthe okunye ukuthi idolobha labo liseduze nomngcele okuyiKosi Bay ohanjelwa kakhulu abavakashi abasuke bezobuka ubuhle bemvelo.
Uqhube wathi uma idolobha selingcolile abantu bagcina sebeliphendula umhhume wezigebengu.
IMeya yaseBig Five Hlabisa, uMnuz Comfort Khumalo ithe okunye abakulwisayo ngemfucuza ukuthi idala nesimo sezulu esinobungozi .
"Kugcina sekuba nezikhukhula ezidala umonakala. Phela ukuguquka kwesimo sezulu kubuye kudalwe imfucuza esiyilahla budedengu," kusho uKhumalo.
Isimo sokuguquka kwezulu kuyakhalwa ngaso ezindaweni eziningi futji kusolwa imfucuza egcwele emadolobheni amaningi ukuthi iyimbangela yokuguquka kwaso.