INKONZO yeMisa obekumele iphathwe nguFata webandla lamaRoma aKhatholika eSt Machael’s izolo ekuseni, igcine isiphenduka imashi yabazalwane bebandla ebihambisana netoyi toyi.
Imashi ebiqhutshwa ngabazalwane bethandazela ukuxoshwa kukaFata wabo ibingaphandle kwamagceke ebandla.
Umkhuleko, obuhambisana nombhikisho obuhlelwe ngamalungu ebandla nomphakathi, inhloso yawo bekunguchitha uFata Vusi Sokhela ophethe ibandla eliseNdonyane Mission, eHighflats.
Amalungu ebandla asola uSokhela ngenkohlakalo.
Athi esikhathini esiyizinyanga eziyisithupha efikile, ukhuphule imali yokungcwaba yaba uR500, ekubeni phambilini abazalwane bebekhokha uR4.
FUNDA: Umphakathi uxoshe uFata osolwa ngenkohlakalo
Abazalwane bakhala nangokuthi ubaphoqa ukuthi bamkhokhele imali ewuR300 uma ezobabusisela izimoto ekubeni uFata obekhona phambilini, ubebabusisela izimoto ngokuzichela ngamanzi angcwele kuphela, angabakhokhisi mali.
Abahola iqolo bathi ubaphoqa ukuthi bakhiphe uR500 umuntu ngamunye.
Abazalwane bathi uSokhela ukhetha iphela emasini, uza kwakho azokubusisela umcimbi uma ezothola imali enkulu.
Othisha nabahlengikazi bathe yibona asebephenduke ‘’izinsengwakazi” zakhe ezimkhiqizela imali.
Ngendlela isimo esishube ngayo, amalungu alo athe asephephela kubefundisi baseZayoni ukuzobabusisela imicimbi yawo ngoba uSokhela akawasanaki.
Asola le nceku ngokuba nenhlamba uma ikhuluma nawo, ukungawahloniphi, nokungawanikezi uthando aludingayo njengamakholwa.
Osukwini lwayizolo amalungu ebandla athe abekhombisa ngokubhikisha ukungeneliseki kwawo ngoba uSokhela usewavimba ngezinkantolo ukuba azosonta ngokukhululeka.
Kusukela ngeSonto eledlule abazalwane nomphakathi wendawo kuthe alenziwanga iMisa emva kokuthi abazalwane nomphakathi kukhumulise uSokhela imijiva yokwenza iMisa lapho ehlala khona eMishini ethi ulungiselela ukuyolenza.
Abazalwane bathe umbhikisho wayizolo bebethumela ngawo kuMbhishobhi ongamele ibandla, ukuthi awasamdingi uSokhela ebandleni.
Ethintwa uMbhishobhi Mlungisi Pius Dlungwane ngoLwesihlanu, uthe udaba ulidlulisele ephinini lakhe, uFata Alexius Madela, ukuba aluphenye.
“Konke uzokuthola kuyena uMadela,” kusho uDlungwane.
UMadela ngoLwesihlanu uthe uxhumanile noSokhela kodwa akukho okubambekayo amtshele kona ngaphandle kokuthi athi abazalwane bamtshele ukuthi abasamfuni endaweni.
Uthe udaba basazoluxoxa noMkhandlu weParish ukuze kuvunyelwane ngesinyathelo esizothathwa ngoSokhela.
Isolezwe lizamile ukuxhumana noSokhela izolo lapho ehlala khona. Owesilisa, ozibize ngoMshumayeli, uthe uSokhela ngeke akwazi ukukhuluma nezintatheli ngoba udaba selusingethwe wuDlungwane.
Okuphawulekile embhikishweni obekubuye kukhulekwe kuwona, wukuthi amaphoyisa abezulazula esiqaphile isimo ngaphakathi emagcekeni esonto nangaphandle.
UMnuz Pat Ngidi, oyilungu lebandla, uthe okubuhlungu wukuthi ukuziphatha kukaSokhela sekwenze kwaba lukhuni ukuthi amakhosikazi nezingane zabo ziqhubeke nokuzokhonza kule ndawo.
“Ngendlela isimo esiyiyona, simbona engaphephile uSokhela. Okwenzekayo yimizamo yokuvikela yena,” kuchaza uNgidi.
Ngesikhathi sokushicilela amalungu ebandla athe azoqhubeka nokubhikisha masonto onke kuze kube wukuthi uSokhela uyahamba.