KUBE yinjabulo yodwa kubadobi bezinhlanzi baseHluhluwe abahlomule ngezinsiza ngemuva kwesikhathi eside bekhala ngokushiwa ngaphandle emathubeni omnotho.
Laba badobi abasebenzisa ichweba iSodwana Bay bahlomule ngezinsiza zokudoba ngaphansi kohlelo lwentuthuko edidiyelwe umasipala iBig Five Hlabisa.
UMnuz Elliot Mthethwa ongomunye wabadobi uthe kuyabathokozisa ukutakulwa wumkhandlu iBig 5 Hlabisa onohlelo lokusiza osomabhizinisi abasebancane.
“Sekunesikhathi eside sishiywa ngaphandle ezinhlelweni zokuthuthukiswa komnotho endaweni. Ngakho- ke kuyasijabulisa ukuthi abaholi basikhumbule nathi ezinhlelweni ezifana nalezi,” kusho uMthethwa.
Banikizwe izinsiza zokudoba izinhlanzi, baphinde bathenjiswa namathuba okuthi bakwazi ukudayisela izitolo zaseHluhluwe nezakwaHlabisa izinhlanzi abazidobile. Lokhu kwenziwa ngenhloso yokukwandisa amathuba omsebenzi nokugqugquzela osomabhizinisi abasebancane.
Imeya yaseBig 5 Hlabisa, uMnuz Comfort Khumalo, ithe isifiso somkhandlu ukuthi kukhuliswe amabhizinisi agxile emkhakheni wokuhweba ngezinhlanzi ngenhloso yokuthuthukisa osomabhizinisi abasafufusa ukuze bakwazi ukuxosha ikati eziko.
Ikhansela, uMnuz Sibusiso Simelane uthe kuyajabulisa ukuthi izikhalo zomphakathi wakule ndawo seziphendulekile njengoba bekuyisifiso sabo ukuthola usizo.
“Okuphinde kwasijabulisa ukuvulwa kwehholo lomphakathi. Lokho kusho ukuthi kuphelile ukubamba imihlangano ngaphansi kwezihlahla nokuyinto ebathwesa ubunzima uma isimo sezulu sisibi,” kusho uSimelane.