INHLANGANO yezeMpilo eMhlabeni, iWorld Health Organisation (WHO) ithi abukho ubufakazi bokuthi igciwane lakamuva leCovid-19 elitholwe eNingizimu Afrika, lithelelana ngokushesha uma liqhathaniswa nelase-United Kingdom lakamuva.
Ungoti wophiko lokugomela izifo noyisikhulu seWHO UDkt Maria Van Kerkhove, uthi imiphumela yesikhashana yocwaningo olubheka ukuthi ngabe igciwane lakamuva laseNingizimu Afrika lithelelana ngokushesha uma liqhathaniswa nelase-UK, ikhomba ukuthi awukho umehluko ekusabalaleni kwala magciwane.
UDkt Van Kerkhove uthi: “Kunocwaningo olwenziwa eNingizimu Afrika olubheka ukuthi leli gciwane lakamuva leCovid-19 lidluliselana kanjani olwenziwa emalabhorethi (labarotories). Ososayensi nongoti bezempilo basebenza kanzima ukuze bathole ukuthi ukhona yini umehluko ekutheni lawa magciwane asabalale. Imiphumela yesikhashana isakhomba ukuthi abukho ubufakazi bokuthi uhlobo lwegciwane elitholakale eNingizimu Afrika lithelelana ngokushesha kunelase-UK."
Okunye okukhathaza umphakathi ukuthi njengoba leli gciwane selizishintshile ngabe umgomo okhona njengamanje, uzosebenza yini ekuvikeleni abantu ekutheni libangene.
UNgqongqoshe wezeMpilo e-UK uMnuz Matt Hancock, nabanye ongoti bathi bakhathazekile ngokuthi kungenzeka umgomo okhona ungabavikeli abantu baseNingizimu Afrika, kuleli gciwane lakamuva eselizishintshile.
UMnyango wezeMpilo kuleli umemezele ukuthi lo mgomo kulindeleke ukuthi ufike kuleli ngo-Ephreli.
UDkt Richard Lesells weKwaZulu-Natal Research Innovation and Sequencing Platform, ucashunwe kweminye imithombo yezindaba ethi okwamanje abukho ubufakazi bokuthi umgomo okhona ngeke ukwazi ukuvikela abantu kuleli gciwane lakamuva.
UDkt Lesells uthi ososayensi basacwaninga ukuthi ngesikhathi leli gciwane lizishintsha, ngabe iDNA yalo iphazamiseke kanjani.
"Okwamanje abukho ubufakazi bokuthi umgomo okhona ngeke ubavikele abantu baseNingizimu Afrika kuleli gciwane eselizishintshile kodwa mancane amathuba okuthi kungenzeka lokho ngoba imigomo ekhona yakhelwe ukuthi ibhekane negciwane ngezindlela eziningi," kusho uDkt Lesells.