KHETHA SANGWENI
KUSUKE igidigidi kufika umholi we-EFF uMnuz Julius Malema, ngoMgqibelo emini, emcimbini weqembu lakhe iSiyabonga Rally ePeople’s Park, eThekwini.
UMalema utheleke esiteji esegijima wangena ngadume ngazo edansa sakushaya itoyitoyi kwachwaza inkundla. I-EFF nobuholi bayo bonke bunkanise eThekwini, njengoba benomcimbi wokubonga abavoti abayixhasile ngesikhathi kunokhetho lohulumeni basekhaya ngoNovemba nyakenye.
Umcimbi we-EFF uqondene nowe-ANC iJanuwari 8 Statement osePolokwane, eLimpopo ngosuku olufanayo. Abalandeli be-EFF baphume ngobuningi babo bengenandaba nelanga ebelikhipha umkhovu etsheni. Emuva kokufika kukaMalema kugibele esteji uDkt Mbuyiseni Ndlozi oyisilomo kwabaningi, wabusisa abantu ngomculo. Ngaphambi kwalokho bekungene amaciko amaningi oZakwe, Duncan nabanye abaculi abafufusayo.