IQOPHE umlando iTS Galaxy iba yiqembu lokuqala elidlala kwiNational First Division ukunqoba inkomishi yePremier Soccer League idla iNedbank Cup ngokuguqisa iKaizer Chiefs ngo 1-0 eMoses Mabhida stadium izolo ebusuku.
Igoli leThe Rockets kube yiphenathi ebaselwe yisilomo, ngokuthanda komthakathi -esibolekwe kwi-Orlando Pirates, uZakhele Lepasa.
Kungenzeka abanye bakhale ngonondweba * -Athenkosi Tom okunguye obeke iphenathi ezale igoli leThe Rockets ngomzuzu ka-90, labo koba abalandeli beChiefs.
IChiefs itheleke eThekwini izolo kumince uwonke wonke, ikakhulukazi iziphathimandla okubalwa kuzo abaholi beqembu nabeTheku.
Lokho kungenxa yokuthi umdlalo wayizolo ubukhumbuza wonke umuntu intuthu eyashunqa ngo-Ephreli nyakenye abalandeli beMpofana beshisa inkundla bedinwa ngukukhishwa kwi-semi final yendebe efanayo yiFree State Stars eyagcina ingompetha.
Ngeshwa kuxoxwa okuhlukile kuloku, iChiefs ibikowamanqamu izolo emdlalweni wougcina ngci wesizini ka-2018/2019 kanti iFree State ihlelela ihlathi ngemuva kokudliwa yizembe ngoMeyi 11.
Empeleni iFree State kuthiwa ixoshe ngisho impukane ihlelela izndleko ezizomelana notiki bamakinati eNational First Division.
Nayizolo iqale ihlokoma inkundla, kuchwaza amakhwela kuxetshulwa neMexican Wave kodwa bese kumince ngisho izinhlanzi kwi-Indian Ocean ngemizuzu yawo-85 sekucaca ukuthi zibheke esikhathini esengeziwe iChiefs, ebiyizimfivilithi, ingayibonile inethi.
Kujabule iqeqebana lezibomvu iGalaxy ithola iphenathi ngomzuzu ka-89.
Nokho obekwenza uhlangothi lweChiefs lumince, ekubeni ibidlala “nezingane” wukushaya kwayo udaka kulandelana amasizini kusuka ngo-2015.
Kwephelile isizini iGlamour Boys izike nakakhulu ebumnyameni iqeda ngaphandle kweTop 8, okuyihlazo eqenjini elibalwa nalandelwa kakhulu e-Afrika.
Ngale kokugqamisa umphumela wayizolo, enye yezinto okumele abantu baseNingizimu Afrika, abasanda kuvota ngoMeyi 8 bekhetha uhulumeni ozobahola njengoMoses kubhekwe eCanaan ezweni lesethembiso, wukuthi amaqembu abegijimisana izolo womabili aphethwe ngabantu abamnyama.
Labo yinkunzi endala engusihlalo weChiefs, uKaizer Motaung oseke wahlonishwa nangobengumengameli wezwe, uJacob Zuma, ngomklomelo ongomunye wemikhulu kuleli enikwa izakhamuzi okungama-Order.
Ongusihlalo weGalaxy nguTim Sukazi, osenguqweqwe lommeli nozixhasele yena ngokwakhe iqembu ngenkampani yakhe, iTim Sukazi Inc.
UMotaung yinkakha kanobhutshuzwayo waseMzansi edlale kwi-Orlando Pirates, okuyizimbangi ezinkulu zeChiefs.
USukazi uzakhele igama kunobhutshuzwayo ngokuphatha izindaba zabadlali ngaphansi kwenkampani yakhe, iQuality Talent Sports.