I-ORLANDO Pirates ikweletise iMamelodi Sundowns icosha amaphuzu amathathu kwiBlack Leopards emdlalweni we-Absa Premiership e-Orlando Stadium ngoLwesithathu ebusuku.
Amagoli ePirates ashaywe nguLuvuyo Memela noThembinkosi Lorch esiwombeni ngasinye.
I-Pirates, eqale umdlalo isesicongweni se-log kodwa ilingana neMamelodi Sundowns ngamaphuzu awu-44, ivule igebe lamaphuzu amathathu phakathi kwayo namaBrazilians amatasa nemidlalo yeCAF Champions League.
EZimnyama zinethuba lokuvula igebe lamaphuzu ayisithupha phakathi kwazo namaBrazilians kwazise zizophinde zidlale oweligi ngempelasonto neFree State Stars. Lokhu kungaba wumqansa kwiSundowns ezobe isisele ngemidlalo emithathu kweZimnyama. ISundowns iyoze idlale oweligi ngo-Ephreli 17 uma isibhekene nomakhelwane bayo iSuperSport United.
Emdlalweni wayizolo, iPirates ihlulwe yithuba ngomzuzu ka-20 ngesikhathi abadlali basemuva uHappy Jele noMarshall Munetsi behluleka ukuvalela phakathi ibhola eligotshwe nguMemela.
Emuva kwemizuzu emithathu uMemela uzibuyele yena wavalela phakathi ifree kick edaleke ngaphandle kwebhokisi emuva kokuthi abadlali beLeopards bedlalise kabi uJele.
UJustin Shonga ushaye phezu kwepali ibhola elimthole ebhokisini kukade kuphazanyiswe ibhola ebeligotshwe nguThembinkosi Lorch kwesokunxele.
Esiwombeni sesibili iLeopards ibuye yacindezela. Ngomzuzu ka-52 uWayne Sandilands utakule iPirates echiliza ishodi likaKarabo Tshepe.
I-Pirates kade izama ukuthola igoli lesibili kodwa ihluleka uma isifike phambili.
Ngomzuzu ka-80 uLorch ungqofele phakathi ibhola likaBen Motshwari.