Maritzburg United (0) 0
Kaizer Chiefs (0) 1
IQHUBEKILE nokujabulisa abalandeli iKaizer Chiefs ishaya iMaritzburg ngo-1-0 emdlalweni obuseHarry Gwala Stadium, eMgungundlovu ngeSonto ebusuku.
Lo mdlalo bekumele uqale ngo-5.30 ntambama kodwa wagcina uqale ngo-7 ebusuku ngenxa yokubheda kwezibani enkundleni. Kudingeke ukuthi kuze kufike onjiniyela bezozilungisa ukuze zigcine zikhanyile.
IChiefs inqobe ngegoli elingqofelwe enethini uBenard Parker ngomzuzu ka-63 kade kuyibhola eligotshwe uKhama Billiat, kade kushaywa ikhona.
Bekuwumdlalo wesibili leli qembu likaStuart Baxter linqoba kulandelana. EzikaBaxter ziye kulo mdlalo ziphuma ekuqumbeni phansi omkhaya bazo, i-Orlando Pirates.
Ngalo mphumela, Amakhosi azoqhubeka nokuhlala endaweni yesithupha kwi-log ngamaphuzu awu-18.
Ukuqalisa kweChiefs abadlali abathathu abadlala esiswini maphakathi abamakayo, okunguPhathutshedzo Nange, Alexander Cole, noNjabulo Ngcobo kwenze iChiefs yangakwazi ukudlala kahle esiwombeni sokuqala.
U-Amadou Soukuma weMaritzburg ubanike inkinga abadlali beChiefs.
Ngenxa yale ngcindezi uNange uze wathola ikhadi eliphuzu. Libe linye kuphela ibhola laMakhosi kulesi siwombe elicishe laba yigoli. Belitholwe uNjabulo Ngcobo, ligotshwe uBilliat.
Izitobha zeChiefs bezisebenza kanzima zimaka uBongokuhle Hlongwane.
Esiwombeni sesibili, iChiefs iwabonile amaphutha ayo, yabuya isivutha. Kugqame uBilliat noKeagan Dolly esiwombeni sokuqala abebengabonakali.
ULeornardo Castro ubonakale okokuqala kule sizini engena endaweni kaDolly.
NgoLwesithathu, ezikaBaxter zizobhekana naMaZulu FC eFNB Stadium ngo-5.30 ntambama.
Ngakolunye uhlangothi, iMaritzburg isendaweni yesi-11 ngamaphuzu ayisibalo esifanayo, ngawo uLwesithathu izodlala neMarumo Gallants, ngo-5 ntambama ePeter Mokaba Stadium.
Imiphumela yeDStv Premiership:
TS Galaxy 1-0 Swallows; SuperSport United 1-2 Marumo Gallants; Cape Town City 0-0 Mamelodi Sundowns; Sekhukhune United 1-0 Royal AM; Baroka 0-1 Chippa United; Lamontville Golden Arrows 0-0 Orlando Pirates; Stellenbosch 2-2 AmaZulu.
Imiphumela yeGladAfrica Championship:
Platinum City Rovers 0-1 Venda Football Academy; Cape Town All Stars 2-2 Jomo Cosmos; JDR 1-1 Richards Bay; Black Leopards 1-0 Pretoria Callies; Hungry Lions 0-1 TS Sporting; University of Pretoria 0-0 Uthongathi; TTM 0-4 Cape Town Spurs.