Bafana Bafana (0) 0
Zambia (0) 0
BEKUNGATHI umdlalo weDStv Premiership ngendlela abemaningi ngayo amagama ajwayelekile ebholeni lakuleli ngesikhathi iBafana Bafana icazelana ngamaphuzu neZambia emdlalweni wokusonga u-Group A weCosafa Cup, ngoLwesithathu ntambama, eNelson Mandela Bay Stadium.
Esikimini seZambia esiqale umdlalo kugqame uKenedy Mweene, Justin Shonga, Gampani Lungu, Augustine Mulenga, Roderick Kabwe noSalunani Phiri bonke abadlalela amaqembu ePremier Soccer League (PSL) kwiDStv Premiership neGladAfrica Championship ngokwahlukana.
Ngaphezu kwalokhu, ebhentshini leZambia bekuhleli uMilutin “Micho” Sredojevic wodumo kwi-Orlando Pirates.
Bekuvele kulindelekile ukuthi iBafana iqale lo mdlalo sakuzithela ngabandayo njengoba ibisizibekisele indawo kweyandulela owamanqamu.
Ngaphambi kwalo mdlalo wayizolo, leli qembu lesizwe libhudluze iLesotho ngo-4-0 ngoLwesibili nokuyifake esigabeni esilandelayo salo mqhudelwano. Yingakho kungazange kumangaze uma lingaqali ngomfutho okungenzeka kudalwe wukukhathala kwabadlali.
Lizodlala neMozambique kweyandulela owamanqamu ngoLwesine ngo-2 ntambama eNelson Mandela Bay Stadium. Komunye owandulela owamanqamu iSenegal izobhekana ne-Eswatini ngo-5 ntambama enkundleni efanayo.
Abadlali abafana noNjabulo Ngcobo, Vusi Sibiya noYusuf Mart bebeyingxenye yabayisishiyagalombili abangazange bawuqale umdlalo weLesotho kodwa umqeqeshi, uMorena Ramoreboli, uwuqale ngabo lo oweZambia.
UVeli Mothwa, ongukaputeni, Siyethemba Sithebe, Mannapule Saleng no-Ethan Brooks okuyibona abebethwele iqembu kusukela umqhudelwano uqala, bonke baqale ngaphandle okuyizinkomba zokuthi uRamoreboli usebheke umdlalo omqoka wakusasa enkundleni efanayo.
Kuzona zombili iziwombe zalo mdlalo, iBafana ibidlala njengeqembu elaziyo ukuthi seliwuqedile umsebenzi ngakho ayikho iminyakazo etheni ebiyenza.
Ngakolunye uhlangothi iZambia ibingazibekile phansi izama ukuvula izimbobo kodwa udonga lukaNgcobo noSibiya belunganyakazi.
Kwale ngisho iZambia isifake bonke abadlali bayo abahlaselayo ukuthi ithole igoli. Ngalesi sikhathi iBafana ibisifake uThabani Dube noRushine De Reuck ukuqinisa nakakhulu emuva.