INDUKU ka 3-1 ededelwe yiBaroka FC kwiSuperSport United, nokubambana ngo 0-0 kweSwallows neChippa United kuwushiye uvulekile umnyango wezembe njengoba kungakacaci ngelizomudla uma kuvalwa umdiyadiya, okungukusongwa kwesizini ngelizayo.
NgoMgqibelo iDStv Premiership iyasongwa kanti alikabikho iqembu okungathi selidliwe yizembe ngokucacile kuze kube umdlalo wokugcina.
Mabili azogcina engene ekukhaleni nokugedla kwamazinyo ngoba elilodwa liya ngqo ehlathini kanti elinye lizothola ithuba lokujika emidlalweni yokuhlunga.
IBaroka isesengozini kwazise ukubasela kwayo iSuperSport ngo 3-1 kuyinyusele emaphuzwini angu-25 nalingana naweSwallows ekunombolo-15.
ISwallows ibambane neChippa United ngo 0-0 eDobsonville. Elinye iqembu elisasemzabalazweni yiTS Galaxy esale namaphuzu angu-27 emuva kokubambana ngo 0-0 neMarumo Gallants ePolokwane.
IBaroka inqobe ngamaphenathi amabili kaBonginkosi Makume negoli lika-Evidence Makgopa. ISuperSport ibike ngegoli lika-Aubrey Ngoma.
Okushubisa umbango wezembe wukuthi amaqembu avika izembe azogadulisana wodwa.
IBaroka izovikisana neMaritzburg United eHarry Gwala kuthi iSwallows ibe kowomkhaya baseSoweto neKaizer Chiefs.
Umdlalo omkhulu kodwa uzoba phakathi kweChippa United neTS Galaxy eNelson Mandela Bay.
OweChiefs neSwallows akusiwo wodwa umdlalo womkhaya ekuvaleni isizini kwazise naKwaZulu-Natal, AmaZulu FC azovala neLamontville Golden Arrows eMoses Mabhida Stadium.
Akupheli lapho naseKapa iStellenbosch izobe ibhekene nomkhaya, iCape Town City eDanie Craven Stadium.
Okushubisa kakhulu lowo mdlalo wukuthi iStellenbosh ilwela ukuma endaweni yayo kwitop8 kanti iCity isigijimela ukweqela iRoyal AM ekuqedeni endaweni yesibili.
Indawo yesibili nayo inokushisa kwazise neChiefs isayijaha ngemuva kokunqoba izolo ngo 1-0 iSekhukhune United.
I-AM isenalo-ke kodwa ithuba lokwenza intando yayo kwazise kunomdlalo engawudlalanga ezobhekana kuwo ne-Orlando Pirates eshaya umlenze wesibili weCaf Confederation Cup.