ZIJIKE mbijane izinto kuMaZulu FC ne-Orlando Pirates abebekhiphana inkani emdlalweni we-Absa Premiership eKing Zwelithini Stadium, eMlazi izolo ebusuku njengoba la maqembu egcine abelane ngamaphuzu kuba ngu 0-0.
Womabili amaqemu aze emdlalweni egajwe wusizi lokunganqobi. Osokhaya AmaZulu abakawini emidlalweni emithathu yeligi ngemuva kokushaywa kwemibili edlule, nokuqubule izinkulumo zokuthi lingase ligcwale umoya ibhantshi kumqeqeshi uCavin Johnson uma bethola isibhaxu kwiPirates.
EZimnyama bezinolwazo utalatiya, bese zihlulwe imidlalo emithathu ilandela. Kuqale ngoweCaf Champions League, oweligi noweMTN 8 ngempelasonto edlule.
Nokho leli phuzu elitholwe iqembu ngalinye nokuzimisela enkundleni njenoba bebekhiphana inkani, kufanele wukuthi kwenze uJohnson nozakwabo kwiPirates uRulani Mokwena basale ngethemba lokuthi ngokuzayo, izinto zizojika ngokugcwele bathole amaphuzu aphelele.
AmaZulu kumele akwenze lokho uma esedlala neHighlands Park koweligi ekuhambeni ngesonto elizayo. IPirates ikudinga njengemali ukuwina ngempelasonto uma isidlala neGreen Eagles yaseZambia emlenzeni wesibili wokuhlunga weChampions League. Ihlulwe ngo 1-0 emdlalweni wokuqala.
AmaZulu agilekile umdlalo usuzoqala kuthinteka unozinti uSiyabonga Mbatha. Ubekhona ngesikhathi bezivocavocela ukuqala komdlalo kodwa kuthe abadlali sebengena enkundleni kwaqhamuka uNiel Boshoff obezoqala ebhentshini.
Bezithengana kube incane indawo esiwombeni sokuqala, impela obekade ewubukele umdlalo ubengakwazi ngisho ukucwayiza ngaphandle kokuphuthwa umnyakazo othile emapalini. Phela bakhona nalabo abebekhona enkundleni kodwa abenganakile nokuthi yini eyenzeka ensimini bezibhiklela ingoma kucaca ukuthi sebeyozwa ngokuhlokoma kwenkundla uma ezabo sezilibeke enetheni.
IPirates iyona eyeke inqwama yamathuba okuhamba phambili. UGabadinho Mhango nguyena obeyiphela endlebeni kodwa nokugeja kuthe bhe.
Amathuba amabili amahle okubeka eZimnyama phambili ehlele yena. Uqale washaya okusasithende kodwa kwaphuma phezu kwamapali. Elinye ithuba lakhe lishaye ipali ethi ulibeka enetheni ngekhandla ibhola ebeligotshwe uSiphesihle Ndlovu. UMhango ubuyile futhi eshiya izitobha zoSuthu zishayisana ngezifuba ebhokisini kodwa ibhola lakhe lamane lavundla phambi kobuso bamapali. Ubungeke usolwe uma ucabanga ukuthi ubeligoba ubengaqonde kushaya igoli.
UXola Mlambo benoThembinkosi Lorch nabo bawatholile awabo amathuba kodwa kwangalunga. Ngasohlangothini lwaMaZulu awekho amathuba amaningi athwalise ubunzima unozinti weBucs, uWayne Sandilands ngaphandle kwelikaSiyethemba Sithembe, oshaye inguzunga yeshodi engaphandle kwebhokisi yayoshaya ipali.
USuthu beluya phambili kodwa iminyakazo yalo ivinjwe ingakafiki kuSandilands.
Umnyakazo ubungagcini ngaphakathi ensimini. Ngesikhathi sekhefu omunye walaba ababuka ibhola ngokulintshontsha bekotele kojantshi uhluleke wukuzibamba weqa uthango engena enkundleni. Kodwa aphelelanga ndawo kodwa abakwasidlodlo bakhale phezu kwakhe, wajabha.