BATHOLE elinye ithambo lokugiya abalandeli be-Orlando Pirates ezabo zishaya izimbangi, iKaizer Chiefs ngo 1-0 emdlalweni weMultichoice Diski Challenge (MDC) eVosloorus izolo ntambama.
Lona umdlalo wesibili wabakhaya baseSoweto emuva kokuba iChiefs ijabhise abalandeli ihlulwa iPirates. Kwi-Absa Premiership amaBhakaniya asale ehleka kuvela elomhlathi ngemuva kokuqumba phansi iChiefs ngo 2-1.
NgoMgqibelo la maqembu azophinda ahlangane eMoses Mabhida Stadium eThekwini kowandulela owamanqamu eTelkom Knockout ngo-3 ntambama. Akubuzwa ke ukuthi yibaphi abalandeli abazofika kulo mdlalo beshayela phezulu.
IPirates ithole igoli umdlalo usanda kuqala elishaywe uLehlohonolo Sepeng ngemuva kwemizuzu emithathu. Usebenzise ubudedengu bodonga lweChiefs olungazange lumgade ebhokisini wasala yedwa, wakwazi ukuqedela ibhola abeligotshwe uSimiso Bophelo owenze umsebenzi omuhle eqhamuka ngesokudla.
Ngemuva kwalokho Amakhosi awatholile amathuba okulinganisa kodwa wala uWyane Sandilands ezintini zeBucs.
Amathuba awo ahlele uLebohang Lesako noSizwe Twala esiwombeni sokuqala kodwa bahluleka wukudlula kuSandilands.
USandilands kubonakala sengathi usegxilile lapha eqenjini leMDC, kwazise ushiywe nangaphandle esikwatini seBucs esibhaliselwe ukudlala kwiCaf Champions League eqala ngoDisemba.
Konozinti eZimnyama zibhalise, uSiyabonga Mpontshane, Jackson Mabokgwane noBrilliant Khuzwayo.
IChiefs ibuye ngamandla esiwombeni sesibili yakha inqwaba yamathuba kodwa uSandilands wala emapalini ePirates evimba amabhola anzima ka-Itumeleng Shopane noYaseen Bunting.
Ngemuva komzuliswano wemidlalo yangempelasonto kuminyene utshumo esicongweni njengoba emathathu amaqembu abambene ngamaphuzu awu-15, okuyiCape Town City, Polokwane City neBloemfontein Celtic. IBidvest Wits inamaphuzu awu-15. Iyeke ithuba lokuhlala phezulu ihlulwa iHighlands Park ngo 1-0. Kanjalo naMaZulu FC abenganyukela esicongweni ukube awavumanga ukuhlulwa iLamontville Golden Arrows ngo 2-1 kowabakhaya. Yize iPirates inqobile nokho kwilog isengemuva kweChiefs.
Imiphumela yangempelasonto yeMDC: Mamelodi Sundowns 2-2 SuperSport United; Highlands Park 1-0 Bidvest Wits; Maritzburg United 6-1 Black Leopards; AmaZulu 1-2 Golden Arrows; Cape Town City 0-0 Chippa United; Baroka 1-2 Polokwane City; Free State Stars 1-2 Bloemfontein Celtic; Kaizer Chiefs 0-1 Orlando Pirates