MBONGISENI BUTHELEZI
EseGoli
A KUKHO ukukhuthazeka okudlula okutholwe ngumqeqeshi weMamelodi Sundowns, uPitso Mosimane, ngaphambi komdlalo wezakhe neSuperSport United, eLucas Moripe Stadium, ePitoli, kusasa, ngo-8.15 ebusuku.
UMosimane uzoya kulo mdlalo wabakhaya we-Absa Premiership eshayela phezulu ngemuva kokuqokwa njengomqeqeshi obashaye bonke emakhanda ngoNovemba noDisemba, izolo emahhovisi ePremier Soccer League.
Umdlali obaqwaqwade emakhanda kube nguPhakamani Mahlambi weBidvest Wits ongalibheki ipali kulezi zinsuku.
AmaBrazillians azobhekana naMatsatsantsa a Pitori enokuzethemba njengoba eqhwakele ku-log yePremiership. Ngempelasonto edlule leli qembu likaMosimane lishaye i-University of Pretoria ngo 2-1. Ngasohlangothini lwezikaGordon Igesund izinto azihambi neze kahle. ISuperSport iyibambe endaweni ka-10 ku-log kanti ishaywe yiPolokwane City ngo 4-1 emdlalweni odlule.
UMosimane uthe kumele baqhubeke nokuwina uma bezimisele ngokuphakamisa isicoco seligi ekupheleni kwesizini.
“Ngesikhathi iKaizer Chiefs inqoba isicoco seligi ibilokhu idlala kahle iwina imidlalo ilandelana. Kule sizini iSundowns, Bidvest Wits neMpumalanga Black Aces yibona abenza kahle njengoba sebewine imidlalo eminingi ilandelana.
“Sidlala kahle futhi siwugcinile umgqigqo kodwa sisalingana ne-Aces ngamaphuzu. Ngijabule ngomklomelo kodwa usemkhulu umsebenzi,” kusho uMosimane.
“Umdlalo wethu neSuperSport uzobe ungelula ngoba sidlala neqembu esengike ngaliqeqesha phambilini. Nokho kumele singabazweli siqhubeke nokwenza umsebenzi wethu. Banabadlali abafana noDove Wome oke waba seqenjini lethu ozokujabulela ukudlala kahle uma ebhekene nathi. Kukhona noThuso Phala oke waba khona kuDowns naye odlala kahle.”
UMosimane uzwakale ekhuluma sakubhuqa ngesikhathi ethi amaqembu asePitoli afana nawandawonye.
“Yithina, i-University of Pretoria neSuperSport sifana nabantwana bomzali oyedwa. Kodwa lona ngumdlalo wabakhaya ngakho kasikho isidingo sokukhuthaza abadlali kakhulu,” kubeka uMosimane.
Uthe kuzomele baqale manje ukubheka umdlali abazovala ngaye isikhala sikaBongani Zungu ozoya ePortugal ekupheleni kwesizini.
“Kuzovuleka isikhala esikhulu ngokuhamba kwakhe kodwa into enhle wukuthi sinezinyanga eziyisithupha zonke ukuthi sibheke omunye umdlali. Ungumdlali ofana noWillard Katsande, asivaleki kalula isikhala sakhe.”
Umqeqeshi weSupersport, uGordon Igesund, ukhale ngeshwa lokulimala kwabadlali bakhe basemuva ngaphambi kwalo mdlalo.
“Sineshwa labadlali abalimala njalo emuva okubalwa kubona uGrant Kekana noDenwin Farmer, esisazama ukumakha noSibusiso Khumalo. Sinabo abadlali abahlaselayo kodwa emuva sinenkinga. Laba dlali kabazange badlale sibhekane nePolokwane City nokusilimaze kakhulu kulo mdlalo,” kusho u-Igesund.
“Sifuna ukuwunqoba lo mdlalo wabakhaya noma ungemkhulu njengoweKaizer Chiefs ne-Orlando Pirates. Ngiyethemba nowethu uzokhula eminyakeni ezayo.
“IDowns iyiqembu elidlala kahle futhi elinabadlali abahle, kufanele sibaqaphe ngeso lokhozi, singanikezi ithuba lokudlala,” kusho u-Igesund.