LUYINKIYANKIYA umchwayo waMamboza udaba lokwesula kweMeya kaMasipala wasoPhongolo, uNkk Velephi Sikhosana, okuthiwa ibuye yayihoxisa incwadi yokwesula.
Isolezwe liqale lathola incwadi okuthiwa ngeyemeya ebhalwe ngesandla yasayinwa.
IMeya uNkk Sikhosana isobishini njengoba ikweleta usomabhizinisi wendawo. Udaba lwaze lwangena enkantolo kwaphuma umyalelo wokudliwa kwempahla yayo. Kuvela izindaba zokwesula kwameya nje, ibisivele ihlezi ingasebenzi kwaze kwabanjiswa iphini layo.
UMasipala wasoPhongolo, ngaphansi kwesifunda iZululand, ubuswa yi-IFP emuva kokuwudla kwi-ANC okhethweni lohulumeni basekhaya ngo-2021.
Incwadi iveza ukuthi imeya iyesula esikhundleni nasekubeni yikhansela kuwadi 2. Ikhomba ukuthi ibhalwe ngoLwesihlanu lukaNovemba 17. Encwadini kuzwakala sengathi imeya ithi icela ukushenxa ngoba ixakwe wukugula. Kuphinde kuzwakale sengathi ibonga iqembu ngokuyinika ithuba.
Kuthe kusenjalo kwavela incwadi ebukeka sengathi ibhalwe yimenenja kaMasipala wasoPhongolo, itshela imeya ukuthi ukuhoxisa kwayo incwadi yokwesula akwemukelekile. Incwadi okuthiwa eyemenenja ithi incwadi ebibhalwe yimeya, idluliselwe ebuholini be-IFP obuzonquma ngayo.
Incwadi okuthiwa eyemenenja ithi ngokwayo ukwesula kwemeya kusamile njengoba kunjalo ithathwa njengokuthi isulile, uma inenkinga ingaxhumana nosomlomo. Imeya ithintwe kaningi ocingweni lwayo lungabanjwa.
Okhulumela i-IFP kuzwelonke uMnuz Mkhuleko Hlengwa, uthunyelwe umlayezo ebuzwa ngalolu daba wathula isikhathi eside. Uthe uma ekhunjuzwa wathi akakhohliwe wabuye wathula. Wakhunjuzwa okwesibili kwathuleka kwangabe kusabuya mpendulo.
I-ANC esifundeni sayo iMzala Nxumalo, ikhiphe isitatimende ithi iyazi ngokwesula kwemeya futhi iyakwemukela ngesasasa. Bathe bayazi ukuthi kunamakhansela e-IFP anezikhalo azifaka ngo-2021 emuva kokhetho.
“Kuzokhumbuleka ukuthi i-IFP yaxova uhlu lwamakhansela okusho ukuthi amakhansela akhona awaziwa emphakathi ngoba awahlali emawadini awo. Lokhu akuphazamisanga ukuhanjiswa kwezidingo nje kuphela kuguqise nomkhandlu,’’ kusho i-ANC.
I-ANC ithe izimisele ngokusebenzisana namanye amaqembu ukuqinisekisa ukuthi kubanokhetho lokuchibiyela ukuze kubekwe obunye ubuholi.