ICHWABANSWANI lomlingisi wemidlalo yethelevishini namafilimu, uNomhle Nkonyeni, udlule emhlabeni esibhedlela ngoLwesithathu ekuseni lingakafezeki iphupho lakhe lokusungula isikole sokulingisa.
UNomhle (77) ubesemkhankasweni wokusungula isikole sezobuciko ebesezokufukula amaciko asesifundazweni adabuka kuso, i-Eastern Cape.
Wazalelwa elokishini eNew Brighton, ePort Elizabeth, ngo-Ephreli 9,1942. Ngo-2017 waba yilungu lomdlalo weTV iScandal, umlingiswa wakhe kuwuLulama Langa, owayengunina kaSiseko Langa (okuyindawo eyayilingiswa nguHlomla Dandala). Wangena emkhakheni wokulingisa ngokudlala emidlalweni yeshashalazi eneminyaka ewu-19. Wagqama kakhulu ngokulingisa emdlalweni weshashalazi owawuthi Die Swerfjare van Poppie Nongena eCapab (Cape Performing Arts Board) Theatre eCape Town ngo-1981.
Ube eselingisa emidlalweni eminingi yethelevishini okubalwa kuyo iTsha Tsha, Igazi, Society, Gaz’lam neminye.
UNomhle wake wavela efilimini iRed Dust nethi Catch A Fire. Ngemuva kweminyaka engaphezu kuka-50 eyibambile insimbi ishisa endimeni yezokulingisa, uNomhle wahlonishwa ngendondo yeLife Achievement Award kumaSouth African Film & Television Awards ngo-2016.
UMengameli Cyril Ramaphosa wamklomelisa ngendondo yeNational Order of Ikhamanga. Uhulumeni wase-Eastern Cape ubuye wamhlonipha ngokuguqula umgwaqo waseNew Brighton owawubizwa ngo-Aggrey Road wawuqamba ngeNomhle Nkonyeni Road. UNomhle ushone kade ezobonakala efilimini asanda kulingisa kuyo iKnuckle City ezokhonjiswa kwi-40th Durban International Film Festival (DIFF) yakulo nyaka.