IPHINI likaMengameli wezwe, uMnuz Cyril Ramaphosa, lifuna kusheshiswe uphenyo oluthinta ukulawulwa kombuso yidlanzana ngoba kubulala i-ANC.
URamaphosa, obekhuluma engqungqutheleni yeCosatu izolo, uthe lokhu kuvimbela i-ANC ukuthi isebenzise imigomo.
“Lena ngenye yezingqinamba ezibhekene ne-ANC. Ifuna ziphenywe izinsolo zingafihlwa ngoba zibulala-ANC.”
Uthe bathandazela ukuthi zigcine ziphenywa izinsolo.
I-ANC iphakamise ukuthi kumele kusungulwe uphenyo ngokulawulwa kombuso yidlanzana.
Ifuna kuphenywe zonke izinsolo ezithinta lokhu kulawulwa kombuso kungagxilwa kuphela emndenini wakwaGupta.
“Silwa sodwa ngenxa yalokhu kulawulwa kombuso. Kumele labo abathintekayo bathole ithuba lokugeza amagama abo, sifuna iqiniso liphume.”
Unxuse amalungu eCosatu ukuthi eze nobufakazi obuthinta ukulawulwa kombuso.
Kubalulekile ukuthi amalungu eCosatu akhulume ngezinto ezithinta i-ANC. “I-ANC ngeyenu, ngakho kumele nikhulume ngayo. Kumele uma kunezinguquko kwiKhabhinethi nithintwe neSanco ne-SACP ukuze kucace ukuthi niyizinhlaka ezilinganayo ne-ANC. Akumele kube khona ozonitshela ukuthi thulani uma nikhuluma ngezinto ezithinta i-ANC.”
Kumele kugxilwe ku-2019 njengamanye amaqembu eseqalile ukukhankasa. “Amanye amaqembu aphikisayo aseqalile abheke okhethweni lwango-2019 ngakho nathi kumele ngabe kade saqala. Asakheni i-ANC ukuze siwine ngamalengiso ngo-2019.”
Uthe i-ANC kudingeka ivuke emaqandeni ibuke ngale kuka-2019.
Uphawule nangezinguquko ezinqala kwezomnotho ezihlongozwayo wathi kumele kuhlomule uwonke wonke kuzo, hhayi idlanzana.