SIMPHIWE NGUBANE
INKAMPANI eyengamele amachweba kuleli inikwe igunya wuhulumeni lokuthi ivumele izinhlelo zokuthuthukiswa kwamabhizinisi asemachwebeni olwandle ngenhloso yokudala imisebenzi futhi kuthuthukiswe umnotho wezwe.
Izolo uNgqongqoshe wezokuThutha kuzwelonke, uMnuz Fikile Mbalula, obesechwebeni laseThekwini, uvumele iTransnet National Port Authority ukuba iqale lezi zinhlelo zomnotho wasolwandle okulindeleke zifake uR26 billion emnothweni wezwe.
Izinkampani, okuyiStrategic Fuel Fund, Mnambithi Terminals, Hillside Aluminium Proprietary Limited neDormac Marine Engineering, zinezinhlelo zokukhulisa amabhizinisi azo.
UMbalula, obephelezelwa uNgqongqoshe wezokuThutha esifundazweni, uNkk Peggy Nkonyeni, ufikele enkampanini iDormac.
Imenenja yale nkampani elungisa imikhumbi, uMnuz Chris Sparg, ibathathe yababeka ngemisebenzi abayenzayo uma belungisa imikhumbi efuna ukunweba indawo yokusebenzela.
UMbalula usuke eDormac wayohlangana nosomabhizinisi bezinkampani ezigxile emnothweni wasolwandle babhunga ngokusebenzisana kwabo nohulumeni
IMnambithi Terminals izodala imisebenzi engu-1 500, ifake uR1.5 billion emnothweni wezwe uma isithuthukisa indawo yayo eseMaydon Wharf echwebeni.
Izinhlelo zeStrategic Fuel Fund zizofaka uR22 billion emnothweni wezwe.
IHillside, egxile echwebeni eliseRichards Bay, iqashe abasebenzi abangu-116 000 ngokugcwele, nabayitoho abawu-28 500. Ifaka uR3.438 billion emnothweni wezwe ngonyaka.
IDormac, eqashe abasebenzi abawu-136 izovuselela ukusebenzisana enakho neTransnet noMkhandlu weTheku okufaka uR17.5 million ngonyaka.
UMbalula uthe lokhu kutshwala kwezimali kuzolekelela ekukhuleni komnotho wezwe futhi kudale imisebenzi.