KULINDELEKE ukuthi bavele enkantolo yaseBellville, eKapa, ngoLwesine abashayeli abangu-23 abangaphansi kweCape Amalgamated Taxi Associations (Cata) abasolwa ngecala lokuzama ukubulala.
Abasolwa baboshwe ngemuva kokuthi amaphoyisa ebophe amatekisi angu-8 angaphansi kweCata, kulandela ukudutshulwa kwamalungu eDelft Taxi Association (Deta) ngoLwesibili.
Okhulumela amaphoyisa, uFrederick van Wyk uthe abashayeli ababoshiwe bebedubula bebhekise erenki ekuMain Road. Uthe abasolwa abathathu badutshulwe balimala, kwatholwa nezibhamu ezimbili ezingekho emthethweni.
Ukushuba komoya phakathi kwalabo soseshini kuqale emasontweni amathathu edlule, kanti sekushone umshayeli oyedwa weCata nomshayeli webhasi oyedwa. Impi phakathi kwabo isishiye abagibeli abaningi bengenakho okokugibela njengoba iCata isimise konke ukusebenza kwamatekisi ayo eNyanga, Delft, Wynberg, Claremont naseCape Town Station.
Okhulumela iCata, uVictor Wiwi, uthe ukushuba komoya phakathi kwalabo soseseshini kususwe ukuthi abeDeta abasafuni ukubabona kumzila waseDelft.
"Baxoshe abashayeli bethu kulo mzila, babadubula. Kade sithule ngalolu daba. Sikhethe ukuthi kume ukusebenza yonke indawo njengendlela yokuzwakalisa izikhalo zethu ngokwenziwa yiDeta," kusho uWiwi.
Usihlalo weDeta, uNazeem Daniels, uthe kumele luphele udlame wacela abezomthetho ukuthi bangenelele. Uthe ngoLwesibili abangaphansi kwalo soseshini basinda kukubi behlaselwa abashayeli abangaphansi kweCata bebadubula.
"Kudingeke ukuthi sibaleke sicashe. ICata ayidingeki kulo mzila, futhi ngeke isiphoqe ngokusisabisa ukuthi siyivumele," kusho uDaneils.