KUSHONE abantu abangu-1 685 ezingozini zomgwaqo ngesikhathi samaholidi kaKhisimusi kusukela ngoDisemba 1, 2021 kwaze kwaba uJanuwari 11 nonyaka.
Lesi sibalo sikhuphuke ngo-14% uma siqhathaniswa nesabantu abangu-1,448 abashona ngesikhathi esifanayo ngonyaka odlule.
Izibalo zimenyezelwe uNgqongqoshe wezokuThutha kuleli, uMnuz Fikile Mbalula eGrasmere Toll Plaza, eGoli.
UMbalula uthe izingozi eziningi zidalwe abawela umgwaqo endaweni engafanele, isivinini, imigwaqo emanzi eshelelayo, abadlula ezinye izimoto endaweni engafanele nesimo sezulu esingesihle.
Sehle ngo-6.5% isibalo sabashone ezingozini zomgwaqo KwaZulu-Natal ababe ngu-275 besuka kwabangu-294 ngonyaka odlule.
Kuboshwe abashayeli abangu-1 586 abebeshayela bephuze utshwala.
Ubalule izingozi ezinkulu ezibe izinhlekele ezingu-34 ezidlule nemiphefumulo yabantu abangu-223. Uthe lesi isibalo esiphezulu uma kuqhathaniswa nezingozi ezingu-13 okwashona kuzona abangu-72.
UMbalule uthe bahlose ukwehlisa ngo-25% isibalo sezingozi emigwaqweni.