UZIQHATHE nolaka lwabesifazane uMengameli we-African National Congress Women's League (ANCWL) uNkk Bathabile Dlamini ngokugqoka umfaniswano weqembu lezepolitiki kwimashi yokulwa nokuhlukunyezwa kwabantu besifazane eSandton eGoli ngoLwesihlanu.
Le mashi ehlelwe yizinhlangano ezahlukene ezilwela amalungelo abesifazane kuleli ilandela ukubulawa nokudlwengulwa kwabantu besifazane okusabalale ezweni lonkana. Umfundi waseUniversity of Cape Town uNkz Uyinene Mrwetyana wadlwengulwa wabulawa ngumsebenzi wasePosini emasontweni amabili edlule. Ngemuva kokuvela kwezindaba zokubulawa kuka-Uyinene abantu bakuleli bagxile nakwezinye izigameko zakamuva zokudlwengulwa nokubulawa kwabesifazane kuleli.
UDlamini nabanye be-ANCWL bebeyingxenye yeqoqo labesifazane eligasele eJohannesburg Stock Exchange eSandton entathakusa ukuyolwa nokuhlukunyezwa kwabantu besifazane.
Ukugqokwa kwemifaniswano yeqembu le-ANCWL akwehlanga kahle kubantu besifazane abahambele lemashi nokuze kwaholela ekutheni basole uDlamini ngokukhankasela iqembu lakhe ekubeni imashi ingeyokulwa nokuhlukunyezwa kwabantu besifazane.
Ngesikhathi befika oDlamini nabe-ANCWL eJSE, iqoqo ebelidinwe ligane unwabu limemeze lathi: "Khwezi! Khwezi!" likhumbuza laba baholi ukuthi babeseka owayengumengameli wakuleli uMnuz Jacob Zuma ngesikhathi ebhekene necala lokudlwengula uNksz Khwezekile Kuzwayo. Ngesikhathi uZuma ebhekene naleli cala, uDlamini wakhombisa ukumeseka nokwabacasula kakhulu abesifazane bakuleli, bemsola ngokweseka umsolwa kunomgilwa. UZuma waphuma phambili kuleli cala.
Kwivideo esabalale enkundleni uTwitter, uVirginia Magwaza wenhlangano elwela amalungelo abantu abathandana nobulili obubodwa i-Other Foundation ugxeke uDlamini ngokugqoka umfaniswano wezepolitiki.
"Angeke ngikwazi ukumasha nokhongolose ngoba uyena wonke osifake kulolu bishi esikulo. Le mashi akuyona eyeqembu, asiwafuni amaqembu epolitiki la," kusho uMagwaza.
%%%twitter https://twitter.com/hashtag/SandtonShutdown?src=hash&ref_src=twsrc%5Etfw">#SandtonShutdown #AmINext #PayPatriarchyTax pic.twitter.com/rMXU8OUcnA
— Public Broadcaster (@Nyiko_Shik)
%%%twitter https://twitter.com/hashtag/SandtonShutdown?src=hash&ref_src=twsrc%5Etfw">#SandtonShutdownANCWL and it’s president Bathabile Dlamini have been criticized by protesters for wearing party regalia. #eNCA pic.twitter.com/cfHKeFutxw
— Silindelo Masikane (@Slindelo_M)
%%%twitter https://twitter.com/hashtag/SandtonShutdown?src=hash&ref_src=twsrc%5Etfw">#SandtonShutdown pic.twitter.com/S3kx0YfwcQ
— marang setshwaelo (@marangdream)