LUNGILE MAJOKA
UMDLALI weBanyana Banyana, u-Amanda “Toki” Dlamini, ufisa ukudlondlobala ekuhlaziyeni unobhutshuzwayo ngemuva kokuba ebonakale kuSuperSport ekhipha amangwevu akhe enekela ababukeli ngomdlalo we-Africa Cup of Nations (Afcon) phakathi kweBafana Bafana ne-Algeria.
IBafana ihlulwe ngo 3-1 kulo mdlalo kaGroup C obuse-Estadio de Mongomo, e-Equatorial Guinea ngoMsombuluko ebusuku.
Esigqikini sezinkakha zediski ebeziboshelwe kuSuperSport, u-Amanda ubehleli noBenni McCarthy, Aaron “Mbazo” Mokoena noBradley Carnell bonke asebeke bagijima emiqhudelwaneni emikhulu neBafana noSammy Kuffour odabuka eGhana.
Le ntokazi eyayihola iBanyana idlala okokuqala kuma-Olympics ngo-2012 eLondon, ifike kwazwakala njengoba ibiyichaza kuzwakale iminyakazo yeBafana neyezimbangi zayo.
Ithole ukunconywa ngabanye ababukeli enkundleni yokuxhumana i-twitter.
USandile Ndezekeli uthe: “Kudos ku-Amanda Dlamini! Uzoba umhlaziyi webhola omuhle, unakho konke okudingekayo.”
UMuzi_mthembu55 ubhale ebhekise kuRobert Marawa obeshayela ohlelo, ethi: “U-Amanda Dlamini ungumhlaziyi ozethembayo, onolwazi oluningi lwebhola.”
U-Amanda uthe wethemba ukuthi umsebenzi wakhe uzomvulela amanye amathuba.
“Ngingathanda ukuqhubeka nokuba kuthelevishini noma sekuthiwa sengiliyekile ibhola. Ukukhuthazwa engikuthole kulabo ebengisebenza nabo nakubantu abebebukele kuyangigqugquzela. Uma ngiqhubeka ngithola ithuba ngokuzayo, ngizoqhubeka nokuzimisela,” kusho u-Amanda.
Uthe uthole ucingo oluvela kwaSuperSport ngoDisemba bemcela ukuba azoba yingxenye yabahlaziyi. Ubeseke wawenza lo msebenzi phambilini njengoba eke wahlaziya imidlalo yeNdebe yoMhlaba yabesifazane ngo-2011.
Ngemuva kwalokhu uthe uthole elinye ithuba ku-SABC1 ebizelwa kuGood Morning Brazil ngesikhathi kuqhubeka iNdebe yoMhlaba nyakenye.
“Bengingazitsheli ukuthi kuSuperSport bazophinda bangibize. Bengicabanga ukuthi bazothola omunye umuntu ongcono. Ngaphambi kokuqala kohlelo benginovalo oluyisimanga ngoba lona ngumqhudelwano omkhulu, iBafana yenza kahle ngaphansi kukaShakes (Ephraim Mashaba), obekusho ukuthi umdlalo uzobe ubukelwe abantu abaningi. Ngijabule ngendlela engenze ngayo, ngiyathemba ukuthi nabanye abantu sebezobona ukuthi nabantu besifazane bayalazi ibhola, asigcini ngokulidlala nje kuphela,” kusho yena.
Uthe okwamanje ubesanikezwe isikhala sokuhlaziya imidlalo ethinta iBafana.
Umdlalo olandelayo weBafana ukusasa lapho izobe itholene neSenegal ngo-9 ebusuku eMongomo.
Yize le ntokazi eneziqu zeTransportation Management ezithole e-University of Johannesburg, inefiso sokugxila ekuhlaziyeni ngomuso kodwa ithe ayikaziboni iliyeka ibhola.
“Ngisazimisele kakhulu ngokudlala kuBanyana. Kulo nyaka nje sinomsebenzi wokulwela ukuzibekisela indawo kuma-Olympics,” kusho u-Amanda.
Ama-Olympics azayo ango-2016 eRio de Janeiro, eBrazil.
IBanyana yangena okokuqala kulo mqhudelwano ngo-2012.