IHHOVISI likaNgqongqoshe wezeMisebenzi kaHulumeni uNkk Lynne Brown lithi licubungula amaphepha afakwe uMnuz Brian Molefe eNkantolo yabaSebenzi mayelana nokukhishwa kwakhe esikhundleni sokuba isikhulu esiphezulu kwa-Eskom.
"Siwatholile amaphepha avela kuMolefe sisawacubungula," kusho okhulumela uNkk Brown, uMnuz Colin Cruywagen.
UMolefe uye enkantolo ngemuva kokuthi uNkk Brown ngeledlule eyalele ibhodi lakwa-Eskom ukuthi liguqule isinqumo salo sokubuyisa uMolefe.
Okhulumela ibhodi lakwa-Eskom uMnuz Khulekani Qoma uthe uMolefe ufake amaphepha akhe kungqongqoshe nebhodi. Uthe amaphepha afike ngoLwesihlanu.
"Amaphepha ethu okuphendula asikawafaki yingakho ngingazi ukuthi ibhodi lizophendula lithini," usho kanje.
Khonamanjalo, iDA ithi izophikisana nemizamo kaMolefe yokubuyela kwa-Eskom.
USihlalo wesigungu esiphezulu kwiDA uMnuz James Selfe uthe bazongenelela kulolu daba enkantolo yabaSebenzi.