USIHLALO weBhodi yeTransnet, uDkt Popo Molefe, uthi ezinyangeni ezine ezedlule iTransnet ihlanganise ithimba longoti bomthetho nabaphenya amacala athinta imali ukuze baphenye ngokuphulwa kwemithetho ngesikhathi kuthengwa impahla enkampanini.
UMolefe usho lokhu emuva kokuthi uMnyango weziMali uphakamise ukuthi zithathelwe izinyathelo zomthetho izikhulu zakwa-Eskom nezakwaTransnet ngodaba lokuthengwa kwempahla ezinkampanini zikahulumeni phakathi kuka-2012 no-2016.
UMnyango weziMali wacela iFundudzi Forensic Services ukuthi iphenye. NgoLwesihlanu kushicilelwe umbiko weFundudzi.
Phakathi kwezinto ebeziphenywa yiFundudzi Forensic Services wumsebenzi owenziwa yiMcKinsey eNingizimu Afrika, owenziwa yiRegiments Capital Management neTrillian Capital e-Eskom naseTransnet.
UMnyango weziMali ucele oKlebe nophiko oluphenya ngamacala ezimali ukuthi baphenye ukuthi izikhulu zeTransnet neze-Eskom, okuhlanganisa uMnuz Anoj Singh owayephethe ezezimali e-Eskom, baphenywe ukuthi abagwazelwanga yiMcKinsey neRegiments.
IFundudzi iphinde yakhala nangohlelo lokuthengwa kwezitimela eziwu-1 064.
Esitatimendeni uMolefe uthe selokhu beqale uphenyo ezinyangeni ezine ezedlule banike izikhulu ezithile amaphepha okuthi kufanele zikhokhe imali ebalelwa kuR1.3 billion.
Uphinde waveza ukuthi sekumiswe izikhulu eziningi kwaTransnet abale kuzo uMnuz Siyabonga Gama obeyisikhulu esiphezulu oxoshiwe, uMnuz Phetolo Ramosebudi obenguMgcinimafa kwaTransnet oxwayiswe ngokuthi uzomiswa waqoma ukusula emsebenzini, uMnuz Thamsanqa Jiyane, ophethe ezokuthengwa kwempahla eTransnet Engineering osamisiwe, uNkk Lindiwe Mdletshe oyiManager Supply Chain Services omisiwe noMnuz Edward Thomas oyiGeneral Manager of Finance naye umisiwe.
UMolefe uthe okwamanje kusaqhubeka uphenyo futhi ngeke bame kuze kube kujeziswa abathintekayo.
Isikhulu esiphezulu se-Eskom, uMnuz Phakamani Hadebe, sithe zizosetshenziswa iziphakamiso zombiko woMnyango weziMali futhi nabasebenzi benkampani bayalwa nenkohlakalo njengoba beza nemininingwane esizayo ukuthi kujeziswe abangayilandeli imithetho.
Izolo uMnuz Khulu Phasiwe, obhekelele ezokuxhumana kwa-Eskom, uthe sebeqale isigaba sesibili sokucima ugesi kusukela ngo-12.15 emini kuze kube wu-10 ebusuku.
Uxolisile ngokucinywa kukagesi esho nokuthi bawucima ukuze bonge lo okhona ngenxa yokuthi kushoda amalahle.
Uthe abantu kufanele bangene kwi-website yakwa-Eskom ukuze babone ukuthi ugesi ucinywa nini endaweni abahlala kuyo.