INDODA edutshulwe yalimala kanzima ngaphandle kweNkantolo yeMantshi eVerulam ngoLwesithathu kuthiwa ibiyolalela icala nomkayo.
Indoda (66) iphuthunyiswe esibhedlela ngendiza enophephela emhlane emuva kokudutshulwa ekhanda.
Isitatimende seReaction Unit South Africa sithe lokhu kwenzeke ngezithuba zabo-8.30 ekuseni. Umgilwa nomkakhe bebehamba ngezinyawo nomkakhe beya enkantolo ngesikhathi edutshulwa phambi kwakhe.
“Utholakale elele onqenqemeni lomgwaqo ebheke phansi ngobuso. Ubenenxeba lokudutshulwa ekhanda. Kuthiwa kuqhamuke owesilisa okhiphe isibhamu wamdubula wase ebaleka ngezinyawo. Umsolwa ubelindwe yimoto angene kuyo maqede yabaleka,” kusho isitatimende.
Kuthiwa umgilwa, owaziwa ngesishoshovu esilwela umphakathi, usesimeni esibucayi.
Okhulumela amaphoyisa KwaZulu-Natal, uColonel Thembeka Mbele, uthe kuphenywa icala lokuzama ukubulala elivulwe esiteshini eVerulam.
“Kusaphenywa. Ayaziwa imbangela yokudutshulwa komgilwa,” kusho uColonel Mbele.