Nokubongwa Phenyane
LILOKHU liqhubekile nokuqoqa izindondo iqembu lomculo wokholo iJoyous Celebration, osekuneminyaka lakhetha ukuma ukungenela izindondo zakuleli.
Leli qembu izolo lihlonishwe ngendondo yeBest Selling DVD ngeDVD yalo ethi Volume 23 Live at CTICC kumaSouth African Music Awards (SAMA).
UMlindo The Vocalist naye uhlabane ngendondo emcimbini wayizolo njengoba ethole indondo yeBest Selling Artist nge-albhamu yakhe ethi Emakhaya.
UDJ Tira uthole indondo yeBest Kwaito Album nge-albhamu yakhe ethi Ikhenani.
Umcimbi wayizolo uvulwe ngabadansi abahlukene akade begcwele emgwaqweni kugqanyiswa imfashini ehlukene nalapho bekucula khona umrepha uYanga Chief, othole indondo yeBest Hip Hop Album.
Iqembu iBlaq Diamond nalo linandisile emcimbini wayizolo ngengoma yalo ethi Love Letter.
Emcimbini wayizolo kuqalwe kwahlonishwa amaqhawe akuleli, okubalwa uDan Tshanda ohlonishwe ngeLifetime Achievement Award.
Unkosikazi wakhe uSylvia namadodana abo amathathu, bamukele le ndondo bathi ngeyabalandeli bomculo kaDan, emhlabeni wonke.
Nabethuli bohlelo abayidlayo indwangu abaphoxanga nayizolo, uDineo Langa ubegqoke izimpahla zakwa-Ara Emporium, uDonovan yena ubegqoke isudi yakwa-Imprint.
Kosaziwayo abethule izindondo kubalwa uDJ Sabby, ongumsakazi kuYFM, Stephanie B noKid Fonque.
UNhlanhla Sibisi oyisikhulu esiphezulu senkampani ehlela lo mcimbi iRisa, uveze ukuthi uxhaso abalukhonjiswe ngabantu bakuleli njengoba kuqhubeka lo mcimbi lubajabulise kakhulu.
Ubongele bonke abawinile kulo mcimbi.
Abanye abahlomule ngezindondo izolo yilaba:
Beste Pop Album:#Partytjiedier by Kurt Darren
Best Pop Album:Ghost by Mathew Mole