ISIKHALA sikaRobert Marawa kwiMetro FM nakwiRadio 2000 sivalwe ngoThomas Mlambo no-Andile Ncube. UMarawa uxoshwe isigubhukane ngomyalezo awuthunyelelwe ngoWhatsApp ngoLwesihlanu ekuseni.
Emyalezweni bekubgalwe ukuba angabe esazihlupha ngokuzikwethula uhlelo lwakhe ebusuku. Kuhluleke ngisho esencenga, ebatshela ukuthi kunenkakha abesehlele ukuxoxisana nayo kodwa kwanhlanga zimuka nomoya.
Lokho bekusho ukuthi uhlelo ebelwenziwa nguMarawa iMarawa Sports Worldwide seyifinyelele emaphethelweni ngoLwesihlanu. Namhlanje kuqale iSports Night Live with Andile kwiRadio 2000 phakathi kuka6 no7 ebusuku. KwiMetro kuqale olukaThomas iThe Ultimate Sport Show with Thomas Mlambo.
Isikhulu sezokuxhumana kwaSABC, uNksz Gugu Ntuli, uthe ukwethulwa kwalezi zinhlelo kuqondaniswe nokugubha kukaSABC iminyaka engu85 wasungulwa, okuwumcimbi obusakazwa bukhoma kuSABC 2, Ukhozi FM, Metro FM nakwiRSG ngezikhathi ezifanayo.