UMGADLI omusha weKaizer Chiefs, uLeonardo Castro utakule iqembu evalela enethini igoli elinike Amakhosi amaphuzu amathathu ngomdlalo wakhe wokuqala ngesikhathi iqembu liqeda ishobolo leminyaka, lishaya iBaroka FC okokuqala emlandweni.
UCastro ungene ngesiwombe sesibili endaweni kaRyan Moon. Ngomzuzu ka-84, ushaye ingcwenga yegoli ngemuva kwesidididi esidaleke ebhokisini leBaroka. UCastro ufike kuMakhosi kule nyanga esuka kwiSundowns.
IChiefs iqede umdlalo ingasaphelele kulandela ukuthola ikhadi elibomvu kukaJoseph Molangoane ngomzuzu ka-72. Ushaye uKhutso Mohwatseleng ngendololwane.
Igoli likaCastro liphinde lasiza Amakhosi avala igebe phakathi kwawo neMamelodi Sundowns ehlezi esicongweni.
Njengamanje iChiefs isihlezi endaweni yesithathu kwi-log ye-Absa Premiership ngamaphuzu angu-29 emidlalweni engu-18. Isihlukaniswe amahlanu neSundowns eqhwakele.
NgoMgqibelo iChiefs inethuba lokunciphisa igebe libe ngamaphuzu amabili uma ingashaya iSundowns eFNB Stadium.
Umqeqeshi weChiefs uSteve Komphela akazange alishintshe iqembu lakhe elidle iPolokwane City ngesonto eledlule. Izinduku ezintsha zaMakhosi, uCastro noSiphelele Ntshangase baqale ebhentshini. IChiefs iye ekhefini ilandela emuva ngo 1-0 wegoli likaNguzana.
Ngemizuzu engu-25 yokuqala iBaroka ithole amakhona ayisithupha.
U-Itumeleng Khune utakule iChiefs kukubi ngesikhathi uRobin Ngalande edonsa inguzunga yeshodi ephebezwe yilo nozinti weBafana Bafana kwaba yikhona.
Akuzange kuthuse ukubona iBaroka ihamba phambili ngomzuzu ka-31 ngesikhathi uNguzana eba yedwa ebhokisini ngemuva kwebhola ebelishaywe nguTalent Chawapiwa, lashaya ipali labuya lawela kulo mgadli walibeka enethini.
Zithe zibuya ekhefini uRyan Moon ushaye igoli lokulinganisa ngemuva kwebhola abeligotshelwe nguSiphiwe Tshabalala ngomzuzu ka-47. Bekungokwesibili imidlalo ilandelana uMoon eshaya igoli lokulinganisa ngekhanda njengoba enzile nakowePolokwane.
Ngesiwombe sesibili uKomphela ufake uCastro, Ntshangase noDumsani Zuma endaweni kaMoon, Tshabalala noGustavo Paez. IChiefs yiyona ebiphethe umdlalo ngesiwombe sesibili. Abadlali abafakwe nguKomphela bangene noshintsho.