USEPHINDE washaya adume ngazo uSihlalo weChippa United uSiviwe ‘Chippa’ Mpengesi njengoba ibhantshi seligcwale umoya kumqeqeshi uClinton Larsen.
Ekhuluma nephephandaba Isolezwe, uLarsen ukuqinisekisile ukuthi usekhululiwe emsebenzini wokulolonga iqembu. “Yebo kuliqiniso, angiseyena umqeqeshi weChippa United. Kungenxa yesizathu esaziwayo, imiphumela engemihle,” kuchaza uLarsen.
IChippa ishaywe yi-Orlando Pirates ngo 2-1 emdlalweni weligi ngoMgqibelo emini, okuwumphumela odonsele uLarsen ebumnyameni. IChippa ihleli kabuhlungu kunombolo 13 kwiPremiership njengoba ibingakaze inqobe selokhu kuvulwe isizini. Emidlalweni emihlanu yeligi, iChippa isihlulwe kabili yabe isidlala ngokulingana kwemithathu.
ULarsen (48) ubesanda kunconywa uMpengesi ngokuba umqeqeshi onohlonze kwazise ubesayine inkontileka yokwelula ngeminyaka emibili neChippa ngoJuni. Isinqumo sokugcina uLarsen njengomqeqeshi sabalulwa njengesibalulekile ukuze iqembu lizoqhubekela phambili liphinde lizinze.
ULarsen ubesehlale izinyanga eziyisishiyagalolunye kwiChippa, okumenze waba ngumqeqeshi wesibili ukuhlala isikhathi eside eqeqesha leli qembu elinomphathi odume ngokuxosha abaqeqeshi. Babalelwa ku-28 abaqeqeshi asebexoshwe kwiChippa kumasizini angu-10 ngaphansi kobuholi bukaMpengesi.
ULarsen ushiye nerekhodi lamawini angu-8, wadlala ngokulingana kweyisithupha waphinde washaywa kweyisithupha emidlalweni engu-22 isiyonke. ULarsen ubeke iChippa United kumasemi-finals eNedbank Cup ngesizini ephelile, lapho behlulwe khona yiKaizer Chiefs ngo 4-2.
Ngokwemibiko evelayo, umqeqeshi wePeacemakers edlala kwi-ABC Motsepe League, uDuran Francis uzovala isikhala esishiywe uLarsen. IChippa izobhekana neBloemfontein Celtic emdlalweni weligi olandelayo ngoSepthemba 21 eNelson Mandela Bay Stadium.