UMDLALI osephenduke enye yezinsika kuMaZulu FC, uMakhehleni Makhaula, ugcizelela ubumqoka bokuthola amaphuzu aphelele uma sebebhekene neStellenbosch FC koweDStv Premiership namuhla eDanie Craven Stadium ngo-5 ntambama.
AmaZulu azongena enkundleni eshayela phezulu njengoba eseqhube imidlalo emihlanu engahlulwa. Anyukele endaweni yesithathu kwi-log ngamaphuzu awu-37. Endaweni yesibili kuhleli omkhaya iLamontville Golden Arrows ngamaphuzu alinganayo, kuthi esicongweni kuqhwakele iMamelodi Sundowns ngamaphuzu awu-43.
"Umdlalo wethu neStellenbosch ubaluleke kakhulu, sidinga amaphuzu aphelele angasibeka endaweni yesibili. Kubalulekile ukuthi sinciphise amaphuzu iSundowns esishiya ngawo. Siyakuqonda ukuthi ukudlalela ekuhambeni neStellenbosch kuzoba nzima. Emdlalweni odlule saya eVhenda, sakwazi ukubuya namaphuzu amathathu. NakwiStellenbosch sinalo ithuba lokukuphinda lokhu.
"Okujabulisile ekhempini yethu maphakathi nesonto, wumuzwa wentshisekelo yokunqoba. Amalungiselelo ahamba kahle, sazi konke ngezitha zethu, ngisho nobuthaka bazo," kuchaza uMakhaula.
Emlenzeni wokuqala uSuthu lwanqoba ngo-2-1.
Lo mdlali oyibamba esiswini ukhuluma ngendawo yesibili, yingoba i-Arrows izoze idlale ngeSonto neBloemfontein Celtic, eSugar Ray Xulu ngo-3 ntambama.
UMakhaula ofike ekuqaleni kwesizini ka-2020/21, ephuma kwiHighlands Park, ungelinye lamasosha amqoka kuMaZulu aqeqeshwa uBenni McCarthy. Usegijime imidlalo ewu-18 yeligi kwengu-21 esidlaliwe.
Ngakolunye uhlangothi, neStellies esiqeqeshwa uSteve Barker siyawadinga amaphuzu agcwele. Sesihluleke emidlalweni emithathu kulandelana ukuqoqa amaphuzu aphelele.
NgoLwesibili siyeke ithuba lokuwina siyeka iKaizer Chiefs ibuye kabili emdlalweni wagcina uphele ngo 2-2.
Silele kweyeshumi ngamaphuzu awu-23, emidlalweni ewu-21.
Imidlalo yeDStv Premiership
Namuhla - Ngo-5pm: Stellenbosch v AmaZulu (Danie Craven).
Kusasa - Ngo-3pm: Cape Town City v SuperSport United (Cape Town Stadium); TS Galaxy v Tshakhuma (Emirates Airline Park).
NgeSonto - Ngo-3pm: Lamontville Golden Arrows v Bloemfontein Celtic (Sugar Ray Xulu Stadium).
Ngo-5pm: Swallows v Black Leopards (Dobsonville Stadium).
Imidlalo yeGladAfrica Championship:
Namuhla - Ngo-3pm: Jomo Cosmos v Cape Town All Stars (Tsakane Stadium).
Kusasa - Ngo-3pm: Pondo Chiefs v University of Pretoria (King Zwelithini); JDR Stars v Pretoria Callies (Giant Stadium); Free State Stars v Royal AM (Goble Park); Richards Bay FC v Polokwane City (Bay Sports Stadium); Cape United v TS Sporting (Parow Park); Steenberg United v Uthongathi (Idas Valley).
NgeSonto - Ngo-3pm: Sekhukhune United v Cape Town Spurs (Makhulong Stadium).