XOLILE MPISANE
Royal AM (0) 1
Stellenbosch FC (0) 0
IROYAL AM yandise usizi lweStellebosch FC inqoba ngo 1-0 lo mdlalo weDStv Premiership obuseChatsworth Stadium ngeSonto ntambama.
Igoli lokubika livalelwe nguTebogo Potsane ngesiwombe sesibili.
Womabili lawa maqembu angene kulo mdlalo ebheke ukuzifukula njengoba edliwe kweyakamuva kwiligi.
IRoyal AM yagcina iguqiswe yiSekhukhune FC ngo 1-0 kanti iStellies isanda kuqotshwa yi-Orlando Pirates ngo 3-0.
IStellies ephekwa uSteve Barker beyiwuphethe umdlalo ngesiwombe sokuqala kodwa yahluleka ukusebenzisa amathuba ewakhile.
Ibhola ebelithunyelwe ngu-Ashley du Preez ngomzuzu wesithupha lichithwe ngunozinti weRoyal, uHugo Nyame, laqeda layoshaya ipali.
UNyame uphinde wasebenza ngomzuzu ka-22 evimba ishodi ebelidonswe nguJunior Mendieta, waphinde walekelelwa nguLantshene Phalane ovimbe ibhola ebelingqofwe nguNathan Sinkala kulayini.
EzikaJohn Maduka ziqale ukuphaphama sekuzoyiwa ekhefini kodwa ibhola likaNdumiso Mabena livalwe nguDavid van Rooyen ngemuva komnyakazo omuhle obuqalwe nguPotsane.
Igoli elihlukanise lawa maqembu lingene ngomzuzu ka-59 ngesikhathi uVictor Letsoalo echushisa ibhola elihle elitholwe nguPotsane esebhekene nonozinti, walibeka enethini ngonyawo lwesinxele.
Womabili amaqembu akhombise ukukhathala ngasekupheleni komdlalo kwazise bekungelula ukugijima enkundleni ngenxa yemvula eke yayidliva ngaphambi komdlalo nangesiwombe sokuqala.
Kwale kancane ukuthi iStellies intshontshe iphuzu ngomzuzu ka-87 ngesikhathi uWaseem Isaacs ehlangana nebhola ebeligotshwe nguMogamad de Goede, uNyame walivimba ngesandla esisodwa sekuvalwe amehlo.
Lo mphumela ubeke iRoyal AM endaweni yesithathu kwi-log ngamaphuzu angu-21 emidlalweni engu-12. IStellies yehlele endaweni yesine ngamaphuzu angu-21 emidlalweni engu-13.
Bekungokwesibili kule sizini iRoyal ingangenisi goli, nokuyinto ezomthokozisa uMaduka, obekhala ngokuvuza kodonga lwasemuva emidlalweni eyedlule.
IRoyal isizobheka owomkhaya ezowudlala naMaZulu ngoMgqibelo kanti iStellies izobe ibheke ukuvala umkhokha wokudliwa uma isibhekene neMamelodi Sundowns ngawo uMgqibelo.