KUNGASE kuphinde kuyenzele phansi ukudlala ngamathuba okushaya amagoli i-Orlando Pirates enezinhloso zokuhamba ibanga elide emqhudelwaneni iCaf Confederation Cup.
IPirates ithelwe othulini yiMamelodi Sundowns ngo 1-0 emdlalweni weDStv Premiership ngempelasonto edlule phezu kwendathane yamathuba ewatholile ikakhulukazi esiwombeni sokuqala.
NgoLwesithathu eZimnyama zizokwamukela iSagrada Esperanca yase-Angola emdlalweni womlenze wesibili wokuhlungela ukungena esigabeni samaqoqo eConfederation Cup. Umdlalo uzoba se-Orlando Stadium ngo-7 ebusuku.
Kowomlenze wokuqala iPirates iwine ngo 1-0 wegoli likaThembinkosi Lorch emasontweni adlule. Iqembu elizowina ngoLwesithathu lizongena esigabeni samaqoqo.
Nokho iPirates ingazithola ingena ehlazweni lokushesha iphume kwiConfederation uma ihluleka ukulwa nesihlava sokuhlulwa ngamagoli esiyihlasele ibhekene ne-Esperanca ekuhambeni nakoweSundowns.
Emuva komdlalo neSundowns, umqeqeshi uJosef Zinnbauer ukhumbule abagadli bakhe abalimele uZakhele Lepasa noTshegofatso Mabasa. Kubadlali abahlulwe ngamathuba kukhona uLorch noVincent Pule.
"Sithole amathuba amaningi. Kodwa kunzima kithina ukuthi silahlekelwe yibona bobabili abagadli uLepasa noMabasa ngesikhathi esisodwa. Uma bekhona bayawashaya amagoli futhi bayawakhanda. Kodwa sinabo abanye abagadli abebekade besenkundleni. Kodwa noma besingadlala eminye imizuzu engu-10 noma engu-20 (ngaphezulu) besingeke silishaye igoli. Kade sidinga ukuzethemba okuphelele ukuze sishaye amagoli. Yebo, asikwenzanga lokho kodwa singakhohlwa ukuthi iSundowns inodonga oluqinile," kusho uZinnbauer.
Abagadli obekulindeleke benzele umsebenzi iPirates nguGabadinho Mhango noTerrence Dzvukamanja.
Abalandeli neZimnyama babone okokuqala umgadli uJan-Marc Mundele wase Democratic Republic of Congo. Lo mgadli udlalile kowomlenze wokuqala weConfederation ekuhambeni, wabuya enconywa kakhulu. KoweSundowns ulitholile ithuba lokushaya igoli lokulinganisa kodwa wahluleka.
"Namuhla ungenile uMundele. Emizuzwini eyisikhombisa yokugcina wathola ithuba eliyingqayizivele kodwa wahluleka ukulibamba kahle ibhola, lamphuyuka. Konke okudingekayo ukuze ushaye igoli besingenakho kulo mdlalo. Kulo mdlalo besingenakho obekudingeka ukuze sidlale ngokulingana noma siyihlule iSundowns. Uma ungalishayi igoli ngeke uwine," kusho uZinnbauer.