LINENSELELO yokubuyela endleleni efanele kwiWorld Sevens Series iqembu lesizwe labesilisa lombhoxo weSevens njengoba liqala uhambo olusha nomqeqeshi uPhillip Snyman emqhudelwaneni waseHong Kong, kule mpelasonto.
USnyman uqokwe njengenhloko yabaqeqeshi ngenyanga edlule kulandela ukukhishwa kukaSandile Ngcobo ngenxa yemiphumela engemihle. Ngaphambi kwalokho, ubeyiphini lalo mqeqeshi kusukela ngo-2022.
Wadlalela amaBlitzbokke iminyaka engu-11 waphinde waba ukaputeni wawo iminyaka eminingi ngaphambi kokugaxa amkhokho emgibeni ngo-2019.
Uyena owayephethe izintambo ngesikhathi enqoba umqhudelwano wokuqala wesizini eDubai ngoDisemba nyakenye, ngenxa yokuthi uNgcobo wayelimele.
Kusukela lapho izinto azilihambelanga kahle iqembu lakuleli njengoba lilale endaweni yesithupha eKapa, kweyesihlanu e-Australia, kweyesishiyagalolunye eCanada, laqeda endaweni ka-11 e-United States ngenyanga edlule.
AmaBlitzbokke asendaweni yesikhombisa kwi-log ngamaphuzu angu-48. Asele ngamaphuzu angu-42 kwi-Argentina ezihola phambili.
Phezu kwakho konke lokho ukaputeni uSelvyn Davids unethemba lokuthi bangakudlulisa okubi osekwenzekile kule sizini, badlale umbhoxo osezingeni elilindelekile eqenjini.
“Umqeqeshi uPhillip ubevele eyingxenye yeqembu lethu ngakho-ke akukho okuningi okushintshile. Siyamazi futhi siyakwazi akulindele kithi. Okumqoka wukuthi senze lokhu akufunayo. Izinhloso zethu azikashintshi.
“Uma uzethemba ungena enkundleni udlale ngendlela ofisa ukudlala ngayo. Uma wesaba ukwenza amaphutha yilapho ugcina sewenza khona ayinqwaba. Ukunikwa ithuba lokudlala ngokukhululeka, kusenza sikhululeke nasemiqondweni,” kusho uDavids
AmaBlitzbokke azovula imidlalo yamaqoqo ngokubhekana ne-Ireland neSpain ngoLwesihlanu ekuseni. Owe-Ireland ungo-5h39 kulandele oweSpain ngo-8h23 . Umdlalo wesithathu ungoMgqibelo neSamoa ngo-4h13 ekuseni.
Khonamanjalo: Iqembu lesizwe labesifazane lizobe libheke ukuqhubeka nomgqigqo walo omuhle kulandela umqhudelwano waseLos Angeles eliqede kuwo endaweni yesithupha.
Imbokodo isendaweni ka-10 kwi-log ngamaphuzu angu-18. Isele ngayi-11 kwiGreat Britain esendaweni yesishiyagalombili, okuyindawo yokugcina eqinisekisa ukudlala esigabeni esiphezulu ngesizini ezayo.
Amaqembu azoqeda endaweni yesishiyagalolunye kuya ku-12 ekupheleni kwesizini kuzomele adlale imidlalo yokuhlunga namaqembu amane azophuma phambili esigabeni sesibili.
Imbokodo izobhekana ne-Ireland ngo-6.02 ekuseni neFiji ngo-9.12 ngoLwesihlanu, ngaphambi kokusonga isigaba samaqoqo ne-Australia ngoMgqibelo ngo-5.25 ekuseni.