AMATHEMBA eNingizimu Afrika asezandleni zesiphalaphala sikazime oyomela elakuleli emncintiswaneni wozime bamazwe omhlaba phesheya kwezilwandle. UBryoni Natalie Govender owathatha indawo yesibili kuMiss South Africa, uhambe izolo eyomela elakuleli kuMiss Universe ose-EI Salvador ngoNovemba 18.
Le ntokazi ingaphansi kwenkulu ingcindezi njengoba elakuleli linomlando wozime abangabuyi belambatha, kodwa abahamba babuye naso isicoco okubalwa nabakamuva uZozibini Tunzi noLalela Mswane.
Izakhamuzi zakuleli zimthwele ngeqoma noBryoni zilokhu zimfisele njalo okuhle kulolu hambo lwakhe.
" U-2023 unyaka wethu wokujabula, ubuye naso ekhaya ndlovukazi noNkulunkulu unawe," kusho uNdumi20.
" Sikufisela konke okuhle, uhambe kahle," kusho uLisa Pillay.
" Lesi sicoco sekuvele kungesethu," kusho uNiv Niv.
" Ngikufisela inhlanhla, uthakasele wonke umzuzu ozoba nawo," kusho uKarabo Legodi.
" Uyibambile nathi sinawe, ubuye naso ekhaya lesi sicoco," kusho uSeema Naicker.
UBryoni ubabaza uthando aluthola kwizakhamuzi zaseNingizimu Afrika ezilokhu zimthumelela imiyalezo nemikhuleko emakhasini akhe kanjalo nelikaMiss South Africa.
"Njengoba ngihlezi lana ngilindele ukuhamba inhliziyo yami iyanconcoza ngothando nokwesekwa olungaka ngiyomela iNingizimu Afrika esiteji esikhulu somhlaba. Engingakusho ukuthi ngiyabonga ngokunginikeza ithuba lomsebenzi omngaka. Ngiyabonga ngokuthi nikholelwe kimi, ngibonwe, ngizwakale. Nothando engihamba nalo nisenhliziyweni yami nonke," kusho uBryoni.
Umcimbi omkhulu uzoba seJosé Adolfo Pineda Arena, kubikwa ukuthi le ndawo ikwazi ukumumatha umthamo wabantu ababalelwa ku-12 900. Kulo mcimbi kulindeleke abasiki bengqephu, onontandakubukwa, ozime bamazwe ahlukene, abatshalizimali nezivakashi eziqhamuka kuwona wonke amazwe omhlaba.