UBHEKENE nesambane umculi weR&B uR. Kelly emuva kokuba umculo wakhe uvaliwe ukudayiswa kwiSpotify.
Lokhu kwenzeka nje umkhankaso iTime’s Up ithi akavalwe kuyona yonke imisakazo namakhonsathi lo mculi osekunesikhathi ebhekene nezinsolo zokuhlukumeza abesifazane ngokocansi.
Ikomiti iWomen of Color likhiphe isitatimende esigcine sesekwa yinqwaba yosaziwayo okubalwa kubona uJohn Legend, Viola Davis, Lupita Nyong’o, Shonda Rhimes esikhombisa intukuthelo ngokunganakwa kwezinsolo esezidonse iminyaka engaphezu kwengu-20 zocansi.
NgoLwesihlanu idlanzana lababhikishi belingaphandle kwendawo okunekhonsathi likaR. Kelly eNorth Carolina lithi alingaqhubeki ikhonsathi. Nokho uR. Kelly ugcine eculile, wafike wenza adume ngazo ethatha umakhalekhukhwini ezihlweleni ewukhuhla kumankwahla akhe egqugquzela nabalandeli ukuthi bazipotopotoze.
Kwenzeka lokhu nje uyavutha nomkhankanso othi #MuteRKelly okuqondwe ngawo ukuqeda ngomculo walesi sihlabani esikhonze ukucula ngocansi.
Kusanda kuvela izinsolo zokuthi uR. Kelly unabesifazane abagcine njengezigqila zocansi emzini wakhe. Usake wabhekana nehlazo lokushada umculi ongasekho U-Aaliyah owayeneminyaka engu-15 ubudala ngaleso sikhathi. Eminyakeni edlule kwasabalala ivideo okwakuthiwa kuvela yena echamela intombazane.
Alikho nokho icala eselike lamlahla.-Daily Mail