SESIPHINDE sagqemeka engeqiwa ntwala isiteshi somsakazo saseThekwini iGagasi FM sidlelwa abasakazi abaphambili uDJ Sphectecula noDJ Naves abazibiza ngeKings of the Weekend.
IKings of the Weekend ibuyela kwiMetro FM lapho ezobamba khona uhlelo lwantambama iKings Suite, ngo-3 kuya ku-6 ntambama. Laba basakazi bashiya lesi siteshi ngo-2016.
IGagasi belisapholisa isilonda sokudlelwa umsakazi ophambili, uMzokoloko, obebamba uhlelo lwasekuseni kulesi siteshi, oseshayela uhlelo lwantambama kuKhozi FM.
IKings of the Weekend izoba yingxenye yezinguquko ezenziwa yiMetro kulandela ukuxoshwa kwentandokazi yabalaleli uDJ Fresh, isikhala sakhe isizovalwa uMo Flava nethimba abesebenza nalo ntambama oPearl Shongwe, Owen Hannie noMoshe Ndiki. Lolu hlelo olungena ngo-5 kuya ku-9 ekuseni luzobizwa ngeMorning Flava.
Ukunikezwa kukaMo Flava nethimba lakhe uhlelo lwasekuseni kushiye isikhala ohlelweni lwantambama esizovalwa yiKings of the Weekend noRelebogile Mabotja.
Imenenja yesiteshi uSibongile Mtyali uthe bagculisekile ngezinguquko abazethulayo kulo msakazo.
Ngemuva kokuxoshwa kwiMetro FM, uFresh uhlabane ngomsebenzi esiteshini saseGoli i-947 FM lapho aseshayela khona uhlelo lwantambama.
KwiGagasi bese kuqala ukuba nozinzo ngemuva kokushiya kukaMzokoloko, njengoba ithimba lasekuseni likaFelix Hlophe, Njabs Zwane noKhaya Dladla liza kahle. IGagasi belingakaphawuli ngokushiya kwalaba basakazi.