KUBE buhlungu izisu ezithamelini ngenxa yamahlaya namancoko kaKhathide "Tshatha" Ngobe woKhozi FM noNgizwe "Zulu Charmer" Mchunu, osezibiza ngenkosi yamabhinca. Lezi zilomo beziyingxenye yezicukuthwane ebezihambele umemulo wendodakazi yomsunguli wamaSouth African Traditional Music Achievement (Satma) Awards, uDkt Dumisani Goba, eMkhosini Sun, eNdwedwe ngeSonto. Izithameli ebezize ememulweni kaNksz Amanda Goba zikujabulele ukubona lezi zintandokazi sezingamathe nolimu emuva kokungahoshelani.
Lezi zinsizwa zazakhela udumo zisazibiza ngoTalagu kuSigiya Ngengoma oKhozini eminyakeni eyedlule. Ubumbano lwazo yilo olwabeka umculo kamaskandi kuleli zinga osukulo. Nentsha yasemalokishini yaqala yazibandakanya nalo mculo ngenxa yobuciko nobuchule balezi zintandokazi. Zagcina zihlabane ngendondo kumaSouth African Radio Award.
Kwakuba mnandi ukubona uTalagu luqhathwe nowayengumsakazi woMhlobo Wenene kumaSatma Awards. Amehlo ezithameli ayehlale ethe njo emikhakheni lezi zinsizwa ezazisuke ziqokwe kuyo.
Ngokuhamba kweminyaka zabuye zaxabana kwakubi impela. Lokho kwaphoqa ukuba abaphathi bazikhiphe ohlelweni lukamaskandi ngoba zazingasakwazi nokusebenzisana. Yize sezaphuma kudala kulolu hlelo kodwa ziqhubekile ngokugxibhana nasezinkundleni zokuxhumana.
Nyakenye uTshatha ucishe wangahlonishwa kwiMpuzuceko Maskandi Festival, ayingxenye yayo, ngenxa yokukhalaza kukaNgizwe, obethi akasoze abungazwa yedwa. UNgizwe ubezishaya isifuba ngokuba namagalelo amakhulu emculweni kamaskandi kunoTshatha. NoTshatha wagcina ehlulekile ukuzibamba, wagadla naye ezinkundleni zokuxhumana. Yingakho iningi labantu likujabulele ukubabona bencokolisana, kumnandi kunjeya.
*Khonamanjalo, uNgizwe ubambe umoya njengoba evela okokugcina eNkantolo yeMantshi yaseRandburg, eGoli, namhlanje ngoLwesibili ngenxa yokuthinteka ekugovuzeni umphakathi ngezibhelu zangoJulayi nyakenye. Kulindeleke imantshi ikhiphe isinqumo ngecala akhe.