KUPHINDE kwadlulela phambili umsakazi weNongoma 88.3 FM emncintiswaneni wabasakazi abasafufusa ababanga ukuhamba ezinyathelweni zengqalabutho uWinnie "Mafungaswe" Mahlangu oKhozini.
KUPHINDE kwadlulela phambili umsakazi weNongoma 88.3 FM emncintiswaneni wabasakazi abasafufusa ababanga ukuhamba ezinyathelweni zengqalabutho uWinnie "Mafungaswe" Mahlangu oKhozini.
UNolwazi Nkosi nguyena odle umhlanganiso kwiGroup 2 womqhudelwano. Ubelandela uzakwabo, uBingelela Mpanza ohlabane kwiGroup 1.
Kuleli sonto kuzobhekwa ukuthi iyiphi intokazi ezojoyina uNolwazi noBingelela kulezi ezidlana imilala kwiGroup 3.
Kulesi sigaba kuqhudelana uBongiwe BP waseMgungundlovu, uNompumelelo "Helicopter" Ndlovu waseMsinga noNqobile "Modelkazi" Dlamini waseDumbe.
Lezi zintokazi sezinawo amava njengoba uBongiwe usakaza kuMgungundlovu FM futhi useke waba yintatheli yelinye lamaphephandaba ezenkolo angasekho.
UHelicopter usezakhele udumo ngokwethula uGubhu Lwami kwi-1KZN TV futhi uke wasakaza kwiTheku FM. UModelkazi wubesakaza kwiSiyathuthuka FM yaseNdwedwe futhi ubuye abe wuDJ Cappuccino osanda kukhipha ingoma yegqom'.
Lesi sicoco sahlwithwa nyakenye yintokazi yasePort Shepstone, uZama Mseleku owenza uhlelo lwangezintathakusa oKhozini.
*Abaqhudelana kuleli sonto ku-Ukhozi Next Presenter Search Competition bavotelwa kanje. UBongiwe umvotela ngokuthumela uhlamvu WINNIE A, uHelicopter uvotelwa ngokuthumela uhlamvu WINNIE B kanti uModelkazi uvotelwa ngokuthumela uhlamvu WINNIE C ku- 33665. Ukubavotela kugcina ngoLwesine ngo-12 emini.