Danny K. Isithombe: Instagram

KUHLUKANE imibono kutholana phezulu owayenguNdunkankulu waseWestern Cape uNkk Helen Zille nomculi ohlonishwayo kuleli uDanny K, esola abantu abamhlophe kuleli ngokuziba indaba yokuthi bahlomula ngobandlululo kuleli.

Indaba isuswe umbhalo kaDanny enkundleni yokuxhumana iTwitter enxusa abantu abamhlophe ukuthi bavume ukuthi basadla izithelo zomlando wakuleli wokucindezelwa kwabantu abamnyama.

“Kuyangishaqa kakhulu ukubona ukuthi abantu abamhlophe eNingizimu Afrika abanazwelo kanjani. Awudingi ukuthi ube ngusiyazi ukuze uqonde ukuthi sazuza ngokucindezelwa kwabantu bohlanga kuleli. Asikuvume lokhu, sikubungaze bese siyakhokha ngakho,” kusho uDanny K kuTwitter.  

UZille ube esephendula lo mculo ngokuphawula ngokuqala ngokumcebisa ukuthi udinga amakilasi okukwazi ukubhala amagama ngendlela eyiyo (spelling).

“Uma uHelen Zille eseziba isikhalo sami ngokuthi kukhulunye ngokucwaswa kwabantu kuleli avele anake isipelingi sakho, ngempela!?’ kuphendula uDanny K

UZille umphendule wathi ungomunye wabantu abahlezi belwa nokucwasana kuleli.

“Ngihlezi ngilwa nokucwaswa kwabantu kuleli, kuzo zonke izinhlaka. Ngihlezi ngikwenza lokhu. ‘Ipolitiki yobuhlanga’ (ebuka abamhlophe njengengembangela yazo zonke izinkinga kuleli) iyingxenye yalesi sifo (sokucwasana). Abantu abaningi abamhlophe engizimatanisa nabo.

Ngemuva kwale nkulumo mpikiswano abantu bashiye imibono yabo abaningi beseka uDanny K kulolu daba.