UBHEKENE nenselelo yokulandela ezinyathelweni zezilomo zabadlali ezishiye iSuperSport United zafika ku-Orlando Pirates zagila izimanga umdlali omusha weZimnyama, uDove Wome.
IBucs ithuse abaningi njengoba bekuvulwe iwindi lokudayiselana ngabadlali ilanda uWome. Leli qembu liboleke uWome kuMatsatsantsa a Pitori kuze kuphele isizini. Lo mdlali, odabuka eTogo, angase abe ngowePirates ngokugcwele ngesizini ezayo uma eshaya into ecokeme.
Namuhla kulindeleke ukuthi abonakale okokuqala iPirates isidudulana nePlatinum Stars eRoyal Bafokeng Stadium, eNorth West emdlalweni we-Absa Premiership ozoqala ngo-7.30 ebusuku.
UWome ubhekene nejoka lokulandela izilomo zabadlali abashiye iSuperSport bafika kuPirates bayisiza yanqoba inqwaba yezicoco.
Ngo-2009/2010, iPirates yasayinisa uKatlego “Mahoota” Mashego owayedlala kuMatsatsantsa a Pitori. Lo mgadli washaya igoli ngomdlalo wakhe wokuqala weZimnyama. Akagcinanga lapho wasiza iqembu laqeda indlala yeminyaka eyisishiyagalombili liphuthwa yizicoco.
Ngo-2010/2011, uMashego wafaka isandla empumelelweni yeZimnyama. IPirates yakhala yemuka nezicoco ezintathu ngesizini eyodwa. Yaba ngompetha be-Absa Premiership, MTN 8 neNedbank Cup.
Ngawo * -2010/2011, iPirates yasayinisa uDaine Klate owayekade egijima kuyona iSuperSport. UKlate washiya iSuperSport ngemuva kokudla izicoco ezintathu zeligi amasizini elandelana. Leli nxele, eseligijima kuBidvest Wits lalingomunye wabadlali ababegqamile ngesikhathi iPirates inqoba izicoco ezintathu ngesizini eyodwa.
UKlate waphenduka isithandwa sabalandeli beZimnyama abaze bametha elikaMatatazela. KuPirates wanqoba izicoco ezimbili zeMTN 8, ezimbili zeligi, eseNedbank neseTelkom. UKlate noMashego babelandela ezinyathelweni zikaTeko Modise owafika kwiPirates waba yintandokazi ngenxa yebhola elinenkosi phakathi ayelidlala kweZimnyama.
Yize engazange awine lutho kuPirates kodwa wayefana nomgogodla weqembu. Waqokwa kabili njengomdlali ovelele ku-Absa Premiership amasizini elandelana. Namanje imilingo kaModise isahlezi ezingqondweni zabalandeli bePirates.
UThandani “Bibo” Ntshumayelo, osanda kumiselwa i-coicane ebholeni, nguyena ogcine ukuwela umngcele osuka ePitoli ubheke eGoli. Ngo-2012 washiya iSuperSport wajoyina iPirates. UBibo ufike kweZimnyama waphenduka isithandwa sabalandeli nabaqeqeshi abebecija iBucs ngaphambi kokuthi ayilahle ngesidakamizwa.
UWome naye kubhekwe ukuthi afake isandla ekutheni iPirates iqede indlala yeminyaka emithathu iphuthwa yizicoco njengoba kwenza uKlate noMashego beqeda eyeminyaka eyisishiyagalombili.
IPirates yagcina ukunqoba isicoco ngo-2014 idla eseNedbank Cup eMoses Mabhida Stadium.
UStuart Baxter uchaze imbangela eyenze bamdedela lo mdlali.
“UDove ungumdlali oseqophelweni eliphezulu kakhulu ukuthi angahlala ebhentshini. Indlela esidlala ngayo yenza ukuthi sigcine sesimsebenzisa endaweni angayithandi okwenza ukuthi angadlali imidlalo eminingi,” kusho uBaxter.