UMQEQESHI weMaritzburg United, u-Eric Tinkler, ukhala uyazithulisa ngokuhamba kwabanye abadlali abebephambili eqenjini lakhe.
I-United idedele uSiphesihle Ndlovu noFortune Makaringe asebejoyine i-Orlando Pirates.
Ukuhamba kwabo kushiya isikhala okumele iqembu lizame ukusivala njengoba kuvulwe iwindi lokusayiniswa kwabadlali abasha ngaphambi kwesizini entsha. Laba badlali bebemqoka njengoba bebeyingxenye esizile ekutheni iTeam of Choice ivike izembe idlala kweyokuhlunga ekupheleni kwesizini edlule.
UTinkler manje usesalelwe umsebenzi wokuhlanganisa iqembu elizokwenza iTeam of Choice ibuyele ekubalweni namaqembu aphezulu kwiPremiership.
“Yizikhala ezimbili ezinkulu ezivulekile, yingakho kunabadlali esibahlolayo. Sifuna abadlali abazozivala lezi zikhala. Akukaze-ke kubelula ukuvala indawo yabadlali ababili ngakho namanje ngeke kubelula ukubathola abadlala njengabo ngqo. Ngeke umthole umdlali ofana nse noNdlovu oyibamba phakathi nesisu kodwa kumele sizame ukuthola ozohambisana nendlela yethu yokudlala okwamanje ngisajabule ngalokhu engisakubona,” kusho uTinkler.
UThamsanqa Sangweni oke wadlala kwiMamelodi Sundowns nePirates ngomunye walabo ababhekwa uTinkler.
“Kukhona nabadlali esibabonile kwi-Africa Cup of Nations. Sidinga ababili noma abathathu ukuze siqede ngesikwati,” kubeka uTinkler. Kuvela nokuthi umgadli uNdumiso Mabena ngomunye walabo abangase basayine eMphithi. Lo mgadli osemabhukwini eBloemfontein Celtic eshiywa abadlali ngenxa yokungabi nayo imali.
ITeam of Choice ayizange ibe nesizini enhle edlule njengoba isizini yonke beyihleli ngesinqe esisodwa kwi-log.
“Okwamanje amalungiselelo ahamba kahle. Abadlali babuyile ngemuva kwekhefu abebelidinga yize belingelide. Ngisakujabulele lokhu engisakubonile ejimini nasemidlalweni yamaqoqo esiba nayo,” kusho uTinkler.
Okwamanje i-United isisayinise uPhumlani Ntshangase, Yosuf Jappie, Judas Moseamedi noKwanda Mngomnyama.
“Ngabadlali ebesibafuna. Iningi labo ngiyalazi. UJudas ube nesizini enhle ngemuva kokuthi esijoyinile (bemboleke kwiCape Town City). Nguyena ebesimdinga kakhulu ngiyajabula ngokuthi sikwazile ukumthola. UPhumlani Ntshangase usemncane ngimazi esafika kwiWits eneminyaka engu-14. Ungumdlali okwazi ukudlala izindawo ezahlukene, uyakwazi ukudlala enkabeni yesisu noma ezinhlangothini emuva. UKwanda useke wadlala lapha phambilini (ebolekwe kwiSundowns). Uyayithanda iMaritzburg ubekulangazelele ukubuya. Ngijabule ngokusayina laba badlali abathathu,” kusho Tinkler.