AKAZIMISELE ukushiya iKaizer Chiefs uSiphiwe “Shabba” Tshabalala ogaqelwe yiCape Town City.
Emasontweni amabili edlule usihlalo weCity, uJohn Comitis, uthe ufuna ukuthenga uShabba noPercy Tau. Inxele lakwabo lisanda kuvuselela inkontileka yalo ngesizini eyodwa naMakhosi.
Maningi amarekhodi asewaqophile uShabba kwisizini ka-2016/2017. Usanda kushaya amagoli awu-50 kuMakhosi. Phezu kwalokho uShabba uphinde wadlala umdlalo wakhe ka-300 kuChiefs.
Imenenja kaShabba, uJazzman Mahlakgane, ithel uShabba akazimisele ngokushiya iChiefs.
“Iyihlaya le ndaba kaShabba neCape Town City. Yinto engeke yenzeke. UShabba weneme kwiChiefs ngakho asikho isidingo sokuthi ashiye. Angiboni ukuthi iChiefs izosibheka nokusibheka isicelo seCity ngoShabba,” kusho uMahlakgane.
UShabba ufike kwiChiefs ngo-2007 esuka kwiFree State Stars. KuMakhosi usezinqobe zonke izicoco ezimqoka. Ushaya ngezicoco ezimbili ze-Absa Premiership, ezimbili zeTelkom Knockout neseNedbank Cup.
Useke wabamba ngisho ibhande likakaputeni, kanti uyiphini lika-Itumeleng Khune ongukaputeni. Njengamanje nguyena ozihola phambili ngokuhlohlwa kwamagoli kwiChiefs. Usehlohle amagoli ayisikhombisa. Amanye amagoli akhe kubhekwe ukuthi aqokelwe kwavelele kule sizini ka-2016/2017 esongwayo.
IChiefs izoqeda isizini ngaphandle kwesicoco. Amakhosi sekuphele amasizini amabili ehluleka wukuphakamisa isicoco. Lokhu kuyaqala ukwenzeka emlandweni wawo.
Asheshe aphuma kwiMTN 8 nakwiTelkom Knockout. KuNedbank Cup aphume kuma-quarterfinal. Kawasekho embangweni wesicoco seligi esikhale semuka neBidvest Wits ngesonto eledlule.
Amakhosi agcina ukunqoba isicoco ngo-2014/2015 kusekhona uStuart Baxter.